“Севинч”: Янги мавсум тайёргарликлари 16 январдан бошланади

Шу куни футболчилар Қарши шаҳридаги клуб қароргоҳида йиғилишади ва янги мавсум тайёргарлик машғулотларига киришади.

Ҳар йилгидек жамоа бу йил ҳам 22 январдан Тошкент шаҳрида бошланадиган мини  футбол (футзал) бўйича XIII Ўзбекистон чемпионатида иштирок этади. Шу муносабат билан дастлабки тайёргарлик машғулотлари ана шу чемпионатга қаратилади. “Севинч” жамоаси футболнинг ушбу тури бўйича ҳам мамлакати аёллар жамоалари ўртасида етакчи ҳисобланади. Жамоа мини футбол бўйича 12 карра Ўзбекистон чемпиони ва 10 марта Ўзбекистон кубоги соҳиби бўлишган.

Айни кунларда жамоанинг 9 нафар футболчиси ва 2 нафар мураббийлари Олмалиқ шаҳрида ўтказилаётган аёллар Ўзбекистон миллий терма жамоаси йиғинида иштирок этишмоқда. Ушбу йиғин 19 январ куни ниҳоясига етади ва футболчилар жамоа сафига келиб қўшилишади.