Сергей Лушчан: "Бизга гол урилган вазиятда Азим Аҳмедовга нисбатан қоида бузилган эди. Саволларни ҳакамларга бериш керак, менга эмас"

"Яхши ўйин бўлди. Баҳс мухлисларга ёқди деган умиддаман. Йигитлардан сўраган барча кўрсатмаларимиз бажарилди. Натижа эса таблода кўриниб турибди. Рақиб ҳам етарлича қонимизни ичди. Яна 2-3та вазиятларимиздан фойдаланганимизда, ўйин масаласини анч эрта ҳал этган бўлар эдик. Яхши жамоага қарши яхши майдонда ўйнаш ёқимли. Омад бугун биз томонда бўлди. Мен VAR тушунмайман тўғриси. Бир ўйинда бошқача талқин қилинади, иккинчисида эса умуман бошқача. Қоидаларда адашиб кетганман. Ҳакамлар комиссияси вазиятларни таҳлил қилиб чиқса керак. Икки жамоа ҳам тенг шароитларда эди" - дея фикр билдирди Сергей Лушчан бугунги баҳс ҳақида.

- "Навбаҳор" сўнгги бир ҳафта ичида учта ўйинда иштирок этди. Зич тақвим футболчиларнинг жисмоний ҳолатига қанчалик таъсир қилмоқда?

- Ҳар бир жамоага ҳар уч-тўрт кунда ўйнаш қийинчилик туғдиради. Биз Кубок баҳсида кам ўйин имкониятга эга бўлаётган футболчиларни майдонга туширган эдик, аммо сўнгги 20 дақиқада асосий футболчиларни майдонга ташлашга мажбур бўлдик. Сабаби натижа керак эди. Икки ўйинда ҳам натижага эришдик, демак яхши ишлаган эканмиз. Энди эса бир ҳафталик танаффус бор ва "Қўқон-1912"га қарши ўйин. Ўйлайманки, футболчилар кейинги баҳсга қадар тикланиб олишади. Кейин эса катта танаффус бор.

- "Бунёдкор" жамоаси қандай қийинчиликлар туғдириши кутган эдингиз ва ўйин жамоангиз учун қанчалик қийин бўлди?

- "Бунёдкор" жиддий жамоа эканлиги сир эмас. Ҳужум чизиғи анча кучли. Рақибни кўп вақт давомида ўрганган эдик. Ўрганганларимизни йигитлар билан бўлишдик. Бугун футболчилар рақибнинг кучсиз жиҳатларидан фойдалана олишди. Ҳимоя чизиғидаги муаммолардан хабардор эдик. Ўйиндан кўнглим тўлди ва мен кутган нарсалар содир бўлди.

- "Навбаҳор" футболчилари танаффусдан сўнг анча фаол бўлдилар. Танаффусда футболчиларга нималар дедингиз?

- Деярли ҳеч нарса. Ўйин жараёнида ўзгариш қилиш қийин. Ўйин тизимини машғулот жараёнида ўрганиб олиш керак. Биз майдон марказида вертикал футбол ўйнай бошладик. Танаффусда йигитларни тинчлантириб олиш керак эди.

- Футболчиларингиз иккинчи бўлимда кўпроқ ўз тартибли ўйнагандек туюлди. Масалан, Русланбек Жиянов биринчи бўлимда турли хил зоналарда пайдо бўлди, аммо танаффусдан сўнг ўз позициясида ҳаракатланди.

- Ўзингиз саволга жавоб бериб қўйдингиз. Сўнгги дақиқаларда икки ҳужумчимиз бир қанотга ўтиб олишди. Улар ҳали ёш. Уларни тинчлантириб олиш керак.

- Жамоангиз тўпга эгалик қилаётган чоғида легионер футболчиларга тўп жуда кам етиб келаётгандек. Мисол учун, жамоангиз позицион ҳужум ташкил этаётган чоғи Тейди тўпни қабул қилиб олиш учун яхши позицияда эди, аммо футболчиларни унга пас беришмади ва аксинча тўпни ортга узатишди. Бунга сабаб ўзаро коммуникациядаги муаммоларми? Легионерлар маҳаллий тилда мулоқот қила олмаслиги сабабли машғулот жараёнларида жамоани тушунишга қийналишмаяпти?

- Машғулотларда бундай муаммо йўқ. Ўйин жараёнида эса ушбу муаммо бор деб ўйлайман. Биз гол урганимиздан сўнг вертикал ўйин услубига ўтиб оляпмиз. Лекин бу Тейдини кўришмаётганини англатмайди. Бизнинг ҳужум чизиғимиз жуда тезкор, холос. Икки тезкор футболчиларимиздан рақиб ҳимоячиларининг ортига очилишни талаб қиламиз. Ўтган мавсумда таркибимизда тажрибали футболчилар кўп эди. Жамоа чарчаб қолган ва тартибсизлик бошланаётган вазиятларда айнан тажрибали футболчиларимиз жамоани тинчлантириши керак эди. Ҳозирги кунда таркибимизда бундай футболчилар йўқ. Ҳозирча натижа яхши, агар натижа қайд этилмаса янги нарса ўйлаб топишимиз керак бўлади.

Тўпга эгалик қилишдан фойда йўқ. Биринчи бўлимнинг ўзидаёқ 800та пас амалга ошириш орқали кўпроқ очколар тўплай олмаймиз. Мен йигитлар учинчи зонадаги агрессив ўйин талаб қиламан. Айрим вазиятлардан фойдалана олмаяпмиз. Биз натижага эртароқ эришишимиз мумкин эди.

- Жамоада пенальтиларни ижро этадиган асосий футболчи ким?

- Бизда Жиянов, Аҳмедов ва Ўринбоевлар машғулотлардан сўнг қолиб пенальтилар тепишади. Мен ҳеч кимни мажбурламайман. Пенальтиларни ижро этиш машғулот дастуримиздан ҳам жой олмаган. Ўйиндан бир кун аввал 11 метрлик зарбани ижро этиши мумкин бўлган 3-4та футболчини эълон қиламиз. Ўйин жараёнида ким ўзига ишонса, ўша футболчи зарбани ижро этади.

- Ҳакам VARда вазиятни кўраётган чоғи сиз "Бунёдкор" бош мураббийи билан бир нималарни гаплашиб олдингиз. Агар сир бўлмаса, нима ҳақида гаплашдингиз?

- Мен ва рақиб бош мураббийи ўйиндаги кўп тўхталишлардан норози эдик. Мен ўша вазиятни бошқача кўрдим, рақиб бош мураббийи эса бошқача. Икки оғиз сўз алмашдик холос. Бизга гол урилган вазиятда Азим Аҳмедовга нисбатан қоида бузилган эди. Менимча, ўша вазиятда қоида бузилган эди. Гол урган футболчига пас берилган вазиятда Азимга нисбатан қоида бузилган эди. Менимча, бу фол. Агар рақиб футболчиси Азимга нисбатан қўпол ўйнамаганида, гол тоза урилган бўлар эди. Фол бўлса гол бекор қилиниши керак. Ҳозирги қоидаларни тушунмайман. Масалан, олдин тўп қўлга тегса пенальти белгиланар эди. Қўл кўтарилганми ёки бошқа ҳолатда фарқи йўқ. Саволларни ҳакамларга бериш керак, менга эмас. Мен ҳам сизлардек оддий инсонман. Қоидалар эса ҳар йили ўзгариб бормоқда.