Сергей Лушан: "Бунёдкор"нинг ишлари аъло бўлади, муҳими - ишонмоқ лозим"

- Биз учун ҳозирги кунда муҳими - натижа. Ўйин борасида муаммолар бор, иккинчи ўйиндирки яхши, кўнгилдагидек ҳаракат қила олмаяпмиз.
Футболчиларда фаоллик, ҳаракатлар бор. Аммо майдонда тўп билан тез фикрлаш етишмаяпти. Ўз ўйинимиз билан мухлисларни хурсанд эта олмаяпмиз.
Айни пайтда биз учун натижа муҳим аҳамият касб этади.

Биз бугун ўзимизни меҳмонда тўп сургандек ҳис қилдикми? Тўғриси, мен бунга ортиқча эътибор қаратмайман. Биз баъзида ўз майдонимиздан кўра сафарда яхшироқ ўйнаймиз. Шу боис бу жиҳат ўйинга ҳеч қандай таъсир кўрсатгани йўқ.

Биз қаерда ўйнасак ҳам мухлисларимиз жамоамизни ёлғизлатиб қўйишмади. Қаерда бўлмайлик уларнинг қўллаб-қувватлашини ҳис этиб турамиз. Улар доимо биз билан бирга. Бунинг учун уларга катта ташаккур билдириб қоламиз.

"Нефтчи"га қарши ўйинда ҳимояда жуда кўпол хатоларга йўл қўйгандик. Бугунги ўйинда ҳам бу камчиликлар тўлиқ ёпилмагани кўриниб қолди.

Ҳимоядаги муаммоларнинг сабаби нимада? Тўғриси, буни ўзимиз ҳам тушунмаяпмиз.
Етакчи футболчиларимиз масъулиятни тўлиқ ўз бўйниларига олишмаяпти. шу нарса мени ҳавотирлантирмоқда.
Зуагини кетгани жамоамизнинг ўйинини тубдан ўзгартириб юборгани йўқ. Бир футболчи жамоамизни ўйинини белгилаб бермайди. Футболда алмаштириб бўлмас футболчининг ўзи йўқ.

Ҳозирча жамоамиздан танаффусдан кейин ўзига келиб олгани йўқ. Ҳужумларни ташкил этишда, ҳимояда тартибли ўйнашда муаммоларга дуч келяпмиз. "Бунёдкор" ҳали иккинчи давра ўйинларига киришиб кетгани йўқ. Буни биз билардик, жамоамиз тўлиқ формага кириб бориши учун 2-3 тур керак бўлишини тахмин қилгандик.

Футболчиларга ўзига бўлган ишонч қайтиши керак. Шундагина уларнинг майдонда ўйлаган режалари, ҳаракатлари самарали чиқади.

Гадоев ҳам, Азимов ҳам яхши ўйнашди. Лекин жамоанинг ўйини чиқмай турган пайтда барча ёмон ўйнаган бўлиб чиқади. Бу пайтда ҳеч кимни алоҳида ажратиб кўрсатишнинг иложи йўқ.
Сардор Азимов ҳамда  Шоҳруҳ Гадоевнинг имкониятларини яхши биламиз ва улар мавсум давомида ўз ўйинларини янада кучайтириб боришларига ишончим комил.
"Бунёдкор"нинг ишлари беш бўлади, муҳими - ишонмоқ лозим.

"Локомотив" ички чемпионатда ҳали очколарни йўқотишига умид қиламиз. ОЧЛда эса уларга ишқибозлик қиламиз. "Локо" жуда кучли жамоа. Айни пайтда ўзбек футболидаги энг кучли жамоа - "Локомотив". Бунга шубҳа йўқ. Уларга қарши жамоалар 220% тайёргарликда майдонга тушишлари лозим. Шундагина рақиб "Локо"ни мағлубиятга учратиш имкониятига эга бўлади. Футболда ютқазмайдиган жамоанинг ўзи йўқ. Шу боис ҳали уларни ҳам ютадиган жамоалар топилиб қолади. Кимлар? Исталган жамоа ютиши мумкин. Фақатгина тўлиқ тайёргарлик ва юқори сифат билан ҳаракат қилмоқ зарур.