Сергей Ковшов: “ЕЧЛда "Ливерпуль" ҳар қандай ҳисобни йўққа чиқариш мумкинлигини исботлади”

Бугунги ўйинда жамоамизда жисмоний тайёргарлик ва руҳият жойида эмаслиги яққол кўзга ташланди. Биринчи бўлимда қайд этилган натижа буни исботи сифатида кўриниб турибди. Танаффус вақтида шогирдларимга узоқ йўл босиб келганлигимизни, ҳар бир футболчида ғурур бўлиши лозимлигини, мухлислар учун ҳам иштиёқ билан ўйнаш зарурлигини тушунтирдим. Иккинчи бўлимда ўйинимиз жонланди.

Ҳаракат қилса натижага эришса бўлади. 3:0га ютқазяпсанми, ҳаракат қил, 4:3 га ютиб кетишинг мумкин. Футболда шунақа вазиятлар ҳам бўладику! ЕЧЛда Ливерпуль ҳар қандай натижани йўққа чиқариш мумкинлигини исботладику! Биз нима қилаяпмиз? Биринчи бўлимдаги каби ёш болаларча хатоликка йўл қўйсак, албатта ютқазамизда. Биринчи бўлимдаги каби ўйнасак, “Истиқлол” керак бўлса 10 та уриши мумкин эди. Биз ҳаракатни бошлаганимизда кеч бўлганди.

Фарғонада яна мағлуб бўлдик. Аввалроқ “Нефтчи”га ҳам худди шу стадионда 4:0 ҳисобида мағлуб бўлгандик. Биз бу борада ишлаймиз, хато ва камчиликлармизни таҳлил қилиб, хулоса чиқарамиз.

Футболчи майдонга тушдими ҳаракат қилиши керак. Машғулотларда ўз устида ишлаши керак, кўзидан ўт чақнаб майдонга тушиши керак. Кимгадир ишониб машғулотларда астойдил ҳаракат қилмаса, футболчи сифатида ўсиши қийин бўлади. Яна такрор айтаман, футболчи майдонга тушдими, астойдил ҳаракат қилиши ва жамоа муносиб бўлиши лозим. Футболни алдаб бўлмайди, ҳаракат қилмасдан футболчи сифатида ўсиб бўлмайди.

Хатолармиз устида ишлаб навбатдаги учрашувларда ғалаба қозонишга, жамоамиз мухлисларини хурсанд қилишга ҳаракат қиламиз


Бекзод Толибов ёзиб олди.