Сергей Лушан: “Биз учун бугун қийин ўйин бўлди”

- Ўйин биз учун қийин бўлди. Рақиб жамоа майдон марказида бизга қизғин курашни таклиф этди ва яхши ўйнади. Бугун жамоам мен истаган даражада ўйнай олмади. Лекин шунга қарамай керакли натижани қўлга киритдик. Ҳаво ҳам жуда иссиқ бўлди. Кўплаб вазиятларни голга айлантира олмадик. Сўнгги учрашувларда гол ўтказиб юбормаяпмиз. Мана шу омил мени қувонтирмоқда. Аввалгидек кераксиз ва ажабтовур голларни ўтказиб юбормаяпмиз. Биз тўғри йўлдан кетмоқдамиз ва кейинчалик ҳам умид қиламанки ушбу йўлдан кетамиз - дея гап бошлади Лушан.

- Воҳид Шодиев нега охирги пайтларда захирада қолиб кетмоқда?

- У ҳали бутун учрашувида тўлиқ ўйнашга тайёр эмас. Жарохати сабаб бир ярим ойни даволаниш билан ўтказди. Шунинг учун ҳозир у ўзининг оптимал формасида эмас. Сўнгги икки баҳсда захирадан тушиб, ўйинни кучайтира олди. Бу жамоамиз учун жуда муҳим. Давралар оралиғида йиғин ўтказамиз ва шунда кўрамиз. Иккинчи  даврада ким асосий таркибда ўйнашини вақт кўрсатади. Ҳужум чизиғидан кўнглим тўқ. Айнан Шомуродов, Ўринбоев ва Шодиевдан.      

- “Қўқон-1912” ўйинига қандай тариф берган бўлардингиз?

- Улар бугун жуда яхши ўйин кўрсатишди. Жамоамизнинг кучсиз ва кучли жиҳатларини яхши ўргангани ўйин давомида сезилиб турди. “Қўқон-1912” кўрсатаётган ўйинидан келиб чиқиб айтадиган бўлсак, уларнинг ҳозирги эгаллаб турган ўрни ўзига мос эмас. “Бунёдкор” бугун маҳорат эвазига ғалаба қозонди. Қўқон жамоаси жуда яхши шаклланган жамоа. Улар ҳар бир рақибга чақилмас ёнғоқдир – дейди Сергей Иванович.