Сайтимиз 1-турнинг энг яхши мураббийи ва футболчисини аниқлади

Championat.asia сайти 2017 йилги мавсумда ҳар бир турнинг энг яхши футболчиси ва мураббийини аниқлашни бошлайди.

Демак, дастлабки турнинг энг яхши мураббийи - "Динамо" устози Илҳом Шарипов. Ўтган йил жамоани биринчи лигадан олий лигага олиб чиққан мураббий бошчилигидаги Самарқанд клуби 1-турда бекободликлар меҳмони бўлди. Кўпчилик мазкур баҳсда "Металлург"нинг ғалабасини тахмин қилаётганди. Бироқ Шарипов бошчилигидаги "Динамо" мардонавор ўйнаб ғалабага эришди.

Биринчи турнинг энг яхши футболчиси деб "Пахтакор" аъзоси Жамшид Искандеров тан олинди. Искандеров "Қизилқум" билан учрашувда жамоасининг мавсумдаги илк голи муаллифлига айланди. Иккинчи таймда эса белгиланган пенальтини бир амаллаб голга айлантира олди. 2017 йилги олий лигада дастлабки дублга эришган Жамшидни турнинг энг яхши футболчиси деб эълон қилишга қарор қилдик.

Олий лигада иккинчи тур ҳам эшик қоқмоқда. 8-10 март кунлари навбатдаги баҳслар бўлиб ўтади.