Сайдулло Раҳматов: "Туркиядаги ўртоқлик ўйинларида натижа эмас, тажриба муҳим"

Кеча жамоанинг машғулотига ташриф буюрган сайтимиз мухбирлари самарқандликлар футболчиси Сайдулло Раҳматовнинг фикрларини олди. 

- "Нефтчи" билан Суперлигага чиқдингиз. Фарғоналиклар сизга янги шартнома таклиф қилишдими ёки кетиш қарори ўзингиздан чиқдими? 

- Аввало "Нефтчи"ни Суперлигага қайтгани билан табриклайман. Буни ўзимни ҳиссамни қўшган бўлсам хурсандман. Фарғона футболи тарбияланувчиси сифатида бу мен учун фахрли иш, деб биламан, 

- "Динамо"нинг чорлови қайси томонлама қизиқ бўлди?

- Клубга вилоят ҳокими ва ҳомийларнинг қизиқиши баланд ва янгича қарашларга эга. Уларда жамоанинг инфратузилмасини яхшилаш режаси бор. Очиғи "Динамо" таклифи кутилмаганда бўлди. Бу жамоа Суперлигага чиқмади, балки қайтди. 

- "Динамо" билан бир йиллик шартнома имзоладингиз. Нима учун кўп йиллик эмас? Умуман олганда бундай шартномаларга муносабатингиз қандай?

- Бир йиллик шартнома туздик. Боиси клуб томонидан шундай муддат берилди. Фикримча, ўзбек футболида бир йиллик шартномани нормал ҳолат сифатида қабул қилиш мумкин. Кўп йиллик келишувлар аста-секин ривожланяпти. Агарда Европа билан таққослайдиган бўлсак, узоқ вақтли шартномаларда бандлари ҳам шундай бўлиши керак. 

- Туркияда олиб борилаётган ўқув-машғулот йиғинлари, ўртоқлик учрашувларидан жамоа нима оляпти?

- Хорижда йиғин ўтказиш ҳар бир жамоага фойдали бўлади. Бу ерда сифатли майдонлар, Европа клублари билан ўртоқлик ўйинларида муаммолар йўқ. Мазкур ўйинларда ютиш ёки ютқазиш, натижа эмас, тажриба олишимиз муҳим.