Саудия Арабистони ва Ироқ олимпия терма жамоаси Ғарбий Осиё чемпионатида иштирок этмоқда

28 декабрь куни ҳар икки жамоа биринчи ўйинини ўтказиб, голсиз дурангга имзо чекишди. Саудияликлар анча кучсиз саналган, лекин ушбу мусобақада яхши ўйин намойиш қилган Фаластин қаршилигини енга олишмади. Баҳс голсиз дуранг билан тугади. Энди эртага Саудия Арабистони Қатар билан майдонга тушади. Фақат ғалаба Саудияни ярим финал сари етаклаши мумкин. Бу жамоанинг Фаластин билан баҳсда ҳаракат қилган таркиби билан танишинг:

Муҳаммад Аловаис, Ал Беши (Ҳамад Сулаймон, 73), Абдуллоҳ Аламмар, Абдуллоҳ Алҳафиз, Мотаз Ҳавсави, Сами Закариа, Абдулфаттоҳ Асири, Абдуллоҳ Отайф, Холид Асири (Салоҳ Муҳаммад, 58), Маан Султон, Муҳаммад Мажраши (Исмоил Мағриби, 46).

Терма жамоага Холид Ал Корони мураббийлик қиляпти. Жамоа таркиби Осиё чемпионатида ҳам юқоридаги футболчилардан иборат бўлиш эҳтимоли 90 фоизга тенг.


Ироқ терма жамоаси Ҳади Мутанаш қўл остида Баҳрайн билан 0:0 ҳисобида дуранг ўйнади. Бугун ироқликлар Уммонни енга олишса, ярим финалга чиқишади. Жамоа Баҳрайнга қарши ушбу таркибда майдонга тушишди:

Жалол Ҳошим, Али Баҳжат, Мустафо Надҳим, Али Фаёз, Волид Ал Лами, Саиф Муҳаммади, Маҳди Комил (Иҳаб Кадим, 58), Аҳмад Фадҳил (Исмоил Дурғам, 85), Саад Добжаҳа, Амжад Калаф, Муҳаннад Каррар (Абдулқодир Тариқ, 78).

Ғарбий Осиё чемпионати айнан 22 ёшгача бўлган терма жамоалар учун ўтказилади. Бу сафар мусобақа Уммондаги қитъа чемпионатидан аввал жамоаларнинг имкониятларини билиб олиш ва жамоавий ўйинни шакллантиришда катта аҳамиятга эга. Чунки бундай расмий баҳсларда орттирилган тажриба қўл келади.

Олимпия терма жамоамиз Тошкентдаги йиғинини якунлади. Энди янги йил байрамидан кейин, 5 январь куни жамоа Дубайга йўл олади. У ерда бир ҳафталик машғулот ўтказилиб, Уммонга жўнаб кетилади. Сиб шаҳрида ўтадиган гуруҳ беллашувларида футболчиларимиз Хитой, Ироқ ва Саудия Арабистони билан тўқнаш келади. Рақиблар ҳақида батафсил маълумотлар яқин кунларда эътиборингизга ҳавола этилади.

Беҳзод НАЗАРОВ.