Саудия Арабистони ЖЧда ярим финални мақсад қилади

Португалиялик мутахассис молиявий томонлама келиша олмаётгани боис ПСЖ билан шартномасини узайтирганича йўқ. Кампуш Саудия томонидан тушаётган таклиф сабабли парижликларнинг молиявий шартлари қизиқарлидек туюлмаган.

Ўтган ҳафтада Кампушнинг вакиллари ва ЖЧ-2034ни қабул қиладиган Саудия Арабистонидан бир қанча амалдорлар учрашув ўтказган. Луишга 10 йиллик шартнома таклиф қилинган ва унда умумий ҳисобда 200 млн евро маош кўрсатилган. Вазифа сифатида Саудия Арабистонининг ўз майдонларида ўтадиган жаҳон чемпионатида даъвогарлардан бири ёки энг камида ярим финалгача бориш айтилган.

Кампуш шу йилнинг охиригача муҳлат олган. Ҳозирча у ПСЖдаги фаолиятидан чалғимоқчи эмас. Лекин томонлар ўртасидаги музокаралар боши берк кўчага кириб қолган.

Кампушда "Арсенал" ва "Челси" вариантлари ҳам бор. Шунинигдек, "Атлетико" ҳам вазиятни кузатиб бормоқда.