Сардор Азимов: "Локомотив"ни иштиёқ ва характер эвазига мағлуб этдик”

“Локомотив” билан ўйин ҳақида

“Бугун қизиқарли ва курашларга бой баҳс бўлди. Биз “Локомотив” билан осон ўйин бўлмаслигини билардик ва машғулотларда ушбу беллашувга пуҳта тайёргарлик кўрдик. Ўйин давомида ҳам тезроқ ҳаракат қилган ҳолда, имкониятларимиздан фойдаланишга уриндик.

Қўлга киритилган ғалаба борасида

“Биз ҳар бир ўйинга рақибдан келиб чиқиб бир хил тайёргарлик кўрамиз. Майдонга чиқдикми, бир оила бўлиб ҳаракат қиламиз. “Локомотив”ни мухлисларимиз қаршисида ютишни истадик. Бош мураббийимиз ҳам ўйин аввалида ортга йўл йўқлигини ва бугун ютмасак бўлмаслигини таъкидлаганди. Қисқаси, иштиёқ ва характер кўрсатган ҳолда ғалаба қозондик.

Ғалаба голи тўғрисида

“Тўғриси, ўйинда гол уришимни кутмагандим. Аллоҳга шукрки, бугун гол уриб, жамоам ғалабасига ҳисса қўшганимдан хурсандман. Жамоадошларимсиз гол ура олмасдим.

Қолган баҳслар хусусида

“Чемпионат тугашига 3 тур қолди. Олдимизда жиддий рақиблар кутмоқда. Мазкур баҳсларга пуҳта тайёргарлик кўрамиз ва мавсумни юқори нотада тугатмоқчимиз. Бу йўлда бизга осон бўлмаслиги аниқ. Лекин “Қўқон-1912” сўнгги турларга қадар ижобий натижалар учун курашади.