Санжар Шоаҳмедов: "Бунёдкор" таклиф билан чиққан эди"

- Аввало ўйин ҳақида фикрингиз?
- Якуний ҳисоб йирик кўриниш олган бўлса ҳам, ўйин қийин ўтди. Биз мураббий белгилаб берган тактика бўйича ўйнадик. Бундан ташқари, кетма-кет иккита тезкор гол урганимиз жамоага фойда бўлди. Ана шу голлардан кейин ҳотиржам ўз ўйинимизни кўрсатишга муваффақ бўлдик.

- Сизни "Бунёдкор" йиғинга чақирган эди. Шу масала нима бўлди?
- Ҳақиқатдан ҳам биринчи давра якунига етгач, "Бунёдкор" жамоаси менга таклиф билан чиқди. Иккала клуб мураббийлари музокаралар ҳам олиб боришди. Лекин, якунда "Олмалиқ"да қоладиган бўлдим.

- Бошқа жамоалардан таклиф бўлмадими?
- Яна бир нечта жамоалар таклиф билан чиқишди, лекин аниқ таклиф билан фақат "Бунёдкор" чиқди. Ҳозирча, клуб билан шартномам ўз ниҳоясига етмагани учун ҳам аниқ таклифлар кам бўлди.

- "Олмалиқ" билан тузган шартномангиз қачонгача мўлжалланган?
- Мавсум охирида шартнома тугайди. Жамоада қолиш ёки қолмаслигимни вақт кўрсатади.

Толибжон Қосимов суҳбатлашди