Самвел Бабаян: "Шундай ўйинларнинг фойдаси катта"

Самвел БАБАЯН (“Пахтакор” бош мураббийи): - Ўйин жуда қийин кечди. “Шўртан” сафида яхши савияли ижрочилар йиғилган. Таркибимиз оптимал бўлгани учун баъзи муаммоларга дуч келдик. Йигитлар яхши футбол намойиш қилишди. Баҳс эса охирги дақиқаларгача кескинликни сақлаб турди. Бу мухлисларга ёқди деб ўйлайман. Шундай беллашувлар кўпроқ бўлиши керак.

Махарадзе ва Искандеров жароҳат олган. Улар “Нафт” ва “Локомотив”га қарши кечадиган учрашувларни ўтказиб юборишса керак. Мавсумдаги муҳим ўйинларда уларнинг хизматидан фойдаланишимиз муаммо бўлиб турибди. Ҳозир жамоавий иштиёқ ва кучли руҳият эвазига учрашувларни ўтказяпмиз. Чунки етакчиларимиз таркибда йўқ. Вазиятдан чиқиб кетиш учун бор кучимизни ишга соламиз.


Мухтор ҚУРБОНОВ (“Шўртан” бош мураббийи): - “Пахтакор”ни ғалаба билан табриклайман. Ўйинга жиддий тайёргарлик кўргандик, аммо ўзимиз олдиндан кутгандек ўйин намойиш этмадик. “Пахтакор” барибир кучли ва жамоа тезроқ ўйнайди. Бизда ҳам имкониятлар бўлди, бироқ улардан фойдалана олмадик. Биринчи бўлимдан кейин футболчиларга устунликни ўз тарафимизга оғдириш мумкинлигини таъкидладим. Бироқ иккинчи бўлим бошидаги гол бизни довдиратиб қўйди. Шу сабабли тезкор алмаштиришларни амалга ошириб, вазиятни ўнглашга ҳаракат қилдим. Охирги 15 дақиқада биз суръатни оширишга интилдик. Ўйин охири асабийроқ тарзда ўтди. Шундай учрашувлар сони кўпайса, бу фойда берган бўларди.