Самвел Бабаян: "Қатарга Нукус-Доҳа йўналиши орқали учдик, бунинг устига Доҳадаги экстра таймлар..."

Самвел Бабаян: "Бу бизнинг энг яхши ўйинимиз дея олмайман. Майдонга шижоатсиз чиқдик, бунга йўлми, "настрой"ми, нима сабаб бўлганини билмайман. Ўзгаришлар орқали ўйинни ўзгартирдик. Иккинчи бўлимда гол урдик, бироқ яна гол ўтказиб юбордик. Кўп вазият яратиб, уни голга айлантира олмаяпмиз. Биринчи даврада бунча ҳужум ташкил қила олмагандик. "Реализация"да оқсаяпмиз.

"Сўғдиёна"ни ғалаба билан табриклайман. Улар "Навбаҳор"га қарши жуда яхши тайёргарлик кўришган экан. Турнирдаги ҳолатимизни оғирлаштириб олдик. Таҳлил қилиб, хатоларни тўғирлаймиз. Чемпионатда яна 9та баҳс бор, бу учрашувларда муносиб ўйин кўрсатишга ҳаракат қиламиз".

- Бугунги мағлубиятга ОЧЛ ўйинидаги узоқ масофа таъсир қилдими?

- Факторлар кўп. Уларнинг орасида йўл ҳам бор. Қатарга Нукус-Доҳа йўналиши орқали учдик, бунинг устига Доҳадаги экстра таймлар... Майдон сифати баҳона бўла олмайди. Биринчи голда футболчимиз сирпаниб кетгани туфайли рақиб дарвозабонимиз билан бирга-бир вазиятга чиқди. Майдонлар сифати бўйича талабчанроқ бўлиш керак. Менинг фикримча, майдон талабга жавоб бермасди. Бироқ бу баҳона эмас, иккала жамоа ҳам бир хил шароитда тўп тепди. Аммо бу нарса ўйин натижасига таъсир кўрсатди.