Самвел Бабаян: "Иккинчи тайм учун Александр Лобановга рахмат айтаман"

Клуб матбуот хизмати, Бабаянни матбуот анжуманига клуб бош мураббийи сифатида кирганлиги учун саволлар ўйинга оид бўлишини илтимос қилди. Уни МТЖ бош мураббийи сифатидаги фикрларини ЎФФ томонидан ўтказилинадиган матбуот анжуманида эшитиш мумкинлиги таъкидланди.

- Ўйиннинг биринчи бўлимида яхши ўйнадик, иккинчи тайм учун Алексанр Лобановга рахмат айтаман. Бугун у жамоамизни бир қатор голлардан қутқариб қолди - дея гап бошлади Самвел Вячеславович.

- Наврўз Алимовнинг ўйинига нима дейсиз?

- Алимовни жароҳатдан энди чиққанлигини ҳисобга олсак, қайтиши ёмон эмас. Энг аввало у "Пахтакор"да ҳар бир ўйинда ғалаба қозониш учун майдонга чиқиш кераклигини тушуниб етиши керак.

- Мурод Холмухамедовчи, уни анчадан бери бугун кўрдик...

- Агар у бизга керак бўлмаганида аллақачон ундан воз кечардик. Лекин у бизга керакли ўйинчи. Холмухамедов олий лигани истаган клубида ўйнай олади. Хозирча у захирамизда, лекин ҳаммаси олдинда

- Кейинги учрашув "Насаф"га қарши бўлади. МТЖ бош мураббийи бўлганингиз бу ўйинга таъсир ўтказмайдими?

- "Насаф" билан баҳсга одатга кўра тайёрланамиз ва жамоани биринчи даврада ўз ўрнида қолишини истаймиз. Буни футболчилар ҳам тушунишмоқда. Биринчи даврадан кейин жамоа билан бирга бўлмайман, аммо бу ерда ишлайдиганларга доимо маслахат бериб туришга тайёрман.

Барибир Самвел Бабаян МТЖга оид ўз фикрини билдириб ўтди.

- Мен истардимки олий лигадаги 16та жамоа бош- мураббийлари МТЖ манфаати йўлида бирлашишимиз керак. Ҳамма ҳамма, ОАВ, мухлислар, мураббий ва футболчилар. МТЖ бу фақат бош мураббий ва ЎФФники эмас, республикамизники. Менимча биз буни уддалаймиз - дейди Бабаян.