Сами Ал Жабер: "Менимча, финалда "Ал Ҳилол" 2:1 ҳисобида ғалаба қозонади"

"Ал Ҳилол" афсоналаридан бири Сами Ал Жабер бугунги учрашув олдидан ОФК расмий сайтига интервью берди. Ал Жабер 2000 йил "Ал Ҳилол" ушбу мусобақада ғолиб чиққан, фақат ўшанда мусобақа Чемпионлар кубоги деб юритиларди.

- "Ал Ҳилол"нинг бу йил ОЧЛда муваффақиятли иштироки сабаби нимада?
- Биз "Ал Ҳилол"ни доим бир текис ўйнайдиган жамоа сифатида биламиз. Бу ерда клуб мураббийлари ва футболчилар бир текис иш олиб боришади. 2009 йилдан бошлаб клуб олдига қисқа, ўрта ва узоқ муддатли режалар қўйилди ва клуб навбати билан ушбу режаларни амалга оширишга ҳаракат қилиб келмоқда.

- Омар Хрбиннинг ўйини сизда қандай таассурот қолдиряпти?
- У шубҳасиз ҳозирги пайтда Осиёнинг энг кучли ҳужумчиларидан бири. Хрбин "Ал Ҳилол"га келганидан бери мунтазам ишламоқда ва янги жамоага тезда мослашиб олди. Суриялик ҳужумчи "Қирол Кубоги"да зафар қучишимизга яқиндан ёрдам берди. У "Урава" билан кечган биринчи баҳсда учта тўп киритиши мумкин эди, бироқ фақат битта гол билан кифояланди. Лекин жавоб ўйинида ўзини тўлиқ кўрсата олади.

- Финалнинг иккинчи учрашувидан нима кутяпсиз?
- Ар Риёдда кечган баҳс "Ал Ҳилол"нинг устунлигида кечди ва буни ҳамма кўрди. Биринчи таймнинг ўзиёқ бизнинг жамоа фойдасига 3:1 ёки 4:1 бўлиши мумкин эди. Аммо футболчиларимиз қулай имкониятлардан фойдалана олишмади, қолаверса рақиб дарвозабони ҳам ўз ишини яхши бажарди. Албатта, Карлос Эдуардонинг жароҳат олиши чатоқ бўлди, бу билан "Ал Ҳилол" 30 фоиз кучини йўқотди. Аммо бизда Наваф Ал Обид, Салим Довсари, Омар Хрбин каби футболчилар бор ва ҳаммамиз жамоага ишонамиз.

- Сиз "Ал Ҳилол"да 20 йилни ўтказгансиз. Қандай хотиралар ёдда қолган?
- Эсда қоларли хотиралар ниҳоятда кўп. Мен бу жамоада ўйнашни бошлаганимда 14 ёш эдим. Фақат "Вулверхэмптон"га ижарага берилганимда бу клубда тўп тепмаганман, қолган вақт доим "Ал Ҳилол" билан бўлганман.

- Финалдан қандай натижа кутяпсиз?
- Албатта, "Ал Ҳилол"нинг ғалабасини. Менимча, биз 2:1 ҳисобида зафар қучамиз.