Руфат Акрамхўжаев: “Нурафшон” билан ўйинда йигитлар охиригача курашгани учун ғалаба қозондик”

Ўйиндан сўнг “банкилар” устози Руфат Акрамхўжаевнинг фикрлари билан қизиқдик.

- Очиғини айтганда, ўйин биз учун яхши ўтди. Ўзимиз учун керакли ҳисобни қайд эта олганимиздан хурсандман. Йигитлар ғалаба қозониш йўлида охиригача курашди. Учрашувда илк бор ҳисобни очганимиз ҳам қайсидир маънода ғалабамизга сезиларли равишда туртки берди. Аммо голдан кейин шогирдларим бироз ҳотиржамликка берилгандек туюлди. Иккинчи бўлимда ҳам битта тўп киритиб, ғалабани ўз томонимизга оғдириб олдик.  

- Менимча ҳеч қайси мураббий жамоасининг ўйинидан тўлиқ қониқиш хосил қилмайди. Гарчи уaнинг жамоаси ғалаба қозонган тақдирда ҳам. Шу боис мен ҳам футболчиларимнинг иккинчи таймдаги харакатидан 70-80 фоизга кўнглим тўлди дейишим мумкин. Таймлар бўйича солиштирадиган бўлсак, кўпроқ иккинчи бўлимда ўйинимиз ўзимиз хоҳлаган кўринишда кечди.

- “Нурафшон” ҳақида нима дейиш мумкин? Кўпчилик бу жамоани олий лигага чиқишга асосий давогар сифатида кўрмоқда. Лекин мен уларни камситмаган холда шуни айтиб ўтмоқчиманки, бу борада “Динамо”нинг олдига тушиш нурафшонликлар учун қийин бўлади. Чунки Самарқанд жамоаси таркибида нисбатан савияси юқори бўлган ўйинчилар жамланган. Қолаверса улар мана бир нечта турки, мағлубиятга учрамай келмоқда. Қувасойнинг “Цементчи” жамоаси билан ҳозирча тўқнаш келмадик. Демоқчиманки олий лига йўлланмаси учун курашда “Нурафшон”га осон бўлмайди. Лекин бу рақибимизга омад тилайман.

- Иқтидорли ҳужумчимиз Тимур Усмонов ҳақида илиқ фикрларни билдиришим мумкин. Ҳужумчига ҳос бўлган ҳислатлар унда мужассам. Бунгача “Локомотив” ёшлар жамоасида ўйнаб келаётганди. Жорий йилдан бошлаб, “НБУ-Осиё» учун харакат қилмоқда. Ҳозирча 12та ўйинда 10та гол урди. Ўйлайманки Усмонов олий лига клубларида ҳам йўқолиб қолмайди ва ҳар қандай жамоа ўйинини кучайтиришга қодир. Агарда унга таклифлар бўлса, маслаҳатлашиб кўрамиз – дейди Руфат Акрамхўжаев.

Исломбек Рустамбеков.