Рўзиқул Бердиев: "Шўртан"га қарши баҳсда мухлисларга ёқадиган ўйин бўлади"

- Янги мавсумнинг илк ўйини дербига тўғри келди. Бу галги старт ҳар қачонгидан ҳам қизиқроқ бўлади деб ўйлайман. "Шўртан" жамоаси билан сўнгги йиллардаги тўқнашувларимиз жуда қийин кечиб келмоқда. Бу қарама-қаршилик ҳақиқий дербиларга хос тарзда ўтади. Ўтган йили ҳам бу жамоа билан ҳар иккала баҳс драматик тарзда кечганди. Бу сафар ҳам осон бўлмаслиги аниқ. Ушбу йилдан "Шўртан" жамоасида янги мураббий иш бошлади. Зоир Тўрақулов мураббий сифатида ўз қарашларига эга деб биламан. "Шўртан" янгича услубда футбол ўйнаши мумкин. Таркибда ҳам тажрибали футболчилар етарли. Шу боисдан, бу баҳс мухлислар учун қизиқарли ўйин бўлади. Таркибда баъзи ўзгаришларга қўл уришим мумкин. Сафимизга жалб этган ёш истеъдодли футболчиларга, янги келиб қўшилган ўйинчиларга имконият берамиз. Шу жиҳатдан олиб қараганда, бу баҳсда ўйин амалиётига эга бўлишлари учун бошқа футболчиларга ҳам имконият тақдим этамиз. Уларни таркибимизга қўшиб олдикми, демак уларга ҳам имкон беришим лозим. Бўлмаса бу футболчилар ўсишдан тўхтаб қолишлари мумкин. Умид қиламанки, дастлабки учрашувда мухлисларимизни хурсанд этамиз.