Рўзиқул Бердиев: "Кубокни ютишимиз учун қўшимча мукофот ваъда қилингани йўқ. Пенальтилар сериясига тайёр эдик"

Ўйин ҳақида

Анчадан бери бундай ажойиб муҳитда футбол ўйнамаган эдик. Ўйин ажойиб бўлди, ҳар икки жамоа кейинги босқичга чиқиш учун курашди. Бугун кўпроқ ҳимояландик, 2-рақамда ўйнадик. Чунки "Навбаҳор" жамоаси ўз уйида кўпроқ ҳужум уюштиришини билардик. Қарши ҳужумда ўйнашни мақсад қилгандик. Ҳар икки голни шундай вазиятлардан, рақибнинг хатосидан кейин урдик. Мезбонлар позицион ҳужумларга урғу бергани билан уларда голли вазиятлар деярли содир бўлмади. Фақат стандарт вазиятни "Навбаҳор" футболчиси ажойиб тарзда бажарганини тан олиш керак. Умуман олганда, ўйин курашларга бой бўлди. Ғалабанинг асосий омили майдонда курашган йигитларимизнинг меҳнатидир.

— Жамоа Суперлигада мавсумни яхши якунланди, кубокда ҳам иштирок давом этмоқда. Жамоа ОЧЛда иштирок этиш учун лицензиялаш билан боғлиқ муаммони ҳал қилмоқдами?

Бу саволга ҳар ўйиндан кейин уюштирилаётган матбуот анжуманларида жавоб беришга мажбур бўляпман. Жамоа қайтадан топширишга ҳаракат қиляпти.

— Кубок ғолиблиги қўлга киритилса, жамоа қандай рағбатлантирилади? Малибу ҳақидаги гап-сўзлар ҳақиқатми?

Бу ҳақда кеча ОАВ орқали ўқидингиз. Бундай хабарларга ишонмайман. Ҳозирча кубокни қўлга киритишимиз учун ҳеч қандай қўшимча мукофот ваъда қилингани йўқ.

— Асосий вақтнинг охирида ҳисоб тенглашганидан кейин пенальтилар серияси ҳақида ўйлагандингизми?

Бунга ҳам тайёр эдик. Шунинг учун пенальтини муваффақиятли амалга оширадиган ўйинчиларни чарчаб қолишига қарамай, майдонда ушлаб турдик.