Рўзиқул Бердиев: "Ғалаба қозонишимиз шарт эди"

- Ўйин қизиқарли воқеликларга бой бўлди. Голлар, қизил карточкалар. Ўйиннинг боришига қарайдиган бўлсангиз, биз ғалаба қозонишимиз шарт эди. Жуда очиқ ўйин бўлди. Бир вазият орқали бирор жамоа ғалабани илиб кетиши ҳам мумкин эди.

- "Насаф" бир очко олдими ёки икки очко йўқотдими?

- Қийин ўйин бўлишини билардик, шу сабабли бир очкога ҳам рози бўлардик. Аммо рақиб аввалига бир киши кам бўлиб қолганидан кейин ғалабани ўйладик. Кейинчалик улар яна бир киши кам бўлиб қолди. Менимча икки очко йўқотдик.

- Мантиқан олиб қараганда рақибдан икки киши кўп бўлиб ўйнаган тақдирда исталган жамоа рақибини ўз жарима майдончаси ичига қамаб, саноқсиз зарбалар бериши керак. Аммо 30 дақиқа ичида иккитагина зарба кам эмасми?

- Албатта, бу бизнинг камчилигимиз. Охирги пайтларда ё сўнгги пасни берадиган ёки сўнгги зарбани йўллайдиган футболчи топилмаяпти. Рақиблар камчилик бўлиб қолганидан кейин бутун таркиб билан ҳимояга ётиб олишди. Шу сабабли зарба беришга қийналдик. Ёддан чиқарманг, бу "Ал Садд" жамоаси. Улар хатто камчилик бўлиб ҳам дарвозамиз олдида хавфли вазият ярата олишди. Шунинг учун ҳам ҳар қандай бундай рақиблар билан эхтиёт бўлиб ўйнаш керак.