Рўзиқул Бердиев: "Биз Суперкубок ва Кубокда хет-трик қилибмиз-ку. Роналду катта эҳтимол билан бизни сотиб олса керак, биз уни эмас"

"Мухлисларимизни ғалаба билан табриклайман. "Андижон"дан бундай ҳужумкор стартни кутмаган эдик. Биринчи бўлим ярмидан сўнг эса ўйинни назорат қила бошладик. Танаффусда босимни кучайтириш кераклиги ҳақида айтилди. Шу сабабли иккинчи бўлимда ҳужумкор футболчиларни майдонга туширдик. Назаримда, бугун рақибдан яхшироқ ҳаракат қилдик ва ҳақли равишда ғалабага эришдик", - деди Рўзиқул Бердиев.

Акмал Мозговой: "Қийин ўйин бўлди. Финаллар осон кечмайди. Атмосфера ажойиб эди. Ғалаба қозонганимиз эса бунданда зўр бўлди"

- Мавсум аввалида "Андижон" билан ўйнаган эдингизлар. Максим Шацких жамоага келганидан сўнг "Андижон"нинг ўйин услубида ўзгариш сездингизми?

- "Андижон"нинг сўнгги ўйинларида ўзгаришлар бўлганини сездим. Улар 2та ҳужумчи билан ўйнашни бошлади. "Андижон" бугун кучли рақибга қарши бўлса ҳам ҳужумкор футбол билан бошлади. Бунга сабаб мураббий мизоси деб ўйлайман. Жамоада руҳий ўзгариш ҳам рўй берган. Схема ва тактикада ҳам ўзгариш бўлган.

- Ўзгаришлардан кўнглингиз тўлдими? Хебайнинг спорт формасига баҳо бериб ўтсангиз?

- Биз янада ҳужумга зўр беришимиз керак эди. Пенальтилар сериясига қадар етказмасдан, ғалаба қозонишимиз керак эди. Шу сабабли Шерзодни ва Рубенни майдонга туширдик. Шерзод Насруллаевнинг актив ўйини туфайли пенальти ишладик ҳисобда олдинга чиқиб олдик.

- Ойбек Бозоров нега терма жамоага чақирилмаётгани ҳақидаги фикрингиз? 

- Терма жамоа бош мураббийи қарорини муҳокама қилмайлик. Кимни таклиф қилиш ва ўйнатиш мураббийларнинг иши.

- Шерзод Насруллаевнинг ҳозирги ҳолати қандай?

- Шерзод анча вақт машғулотларда иштирок этмади. Бугунга қадар бор-йўғи иккита машғулотда қатнашди. Унинг жисмоний ҳолати сабаб 20-30 дақиқа майдонга туширдик.

- Иккинчи таймда жамоангиз янада фаолроқ ўйнай бошлади. Бунга сабаб нимада?

- Рақибга имконият бермаслик ва кўпроқ босим қилишимиз керак эди. Кийиниш хонасида шу ҳақда кўрсатма бергандим. Биз рақиб учун ноқулайликлар туғдиришимиз керак эди. Пенальти бўлган вазиятда юқори босим орқали кўпгина вазиятларда тўплани олиб қўйган эдик.

- Рақиблар "Насаф"ни кўп ўрганишади. Бугун "Андижон" "Насаф"ни қанчалик яхши ўрганган экан?

- Ойбекни ёпа олишди ва Черанга эркин ўйнашга беришмади. Улар ўз усулларини ҳам фойдаланишга ҳаракат қилишди. Рақиб ўтган учрашувларда иккита ҳужумчи билан ўйнаган эди. Бизнинг марказимиз кучли бўлгани учун, "Андижон" учта ярим ҳимоячи билан ўйнади. Масалан, Абдуманноповга узун паслар. "Андижон" бугун юқори иштиёқ билан ўйнади. Маҳорат бизда бўлгандир, аммо иштиёқ "Андижон"да эди.

- "Насаф" ўтган мавсумда ҳужум ортида Сиддиқовни ўйнатаётган эди. Сиддиқовнинг тезкорлиги жамоага устунлик берарди. Ҳозир эса Черан ушбу позицияда ўйнамоқда, лекин Чераннинг тезлиги паст. Драган ҳужумларни секинлаштириб юбормаяптими?

- Чераннинг югуриши керак эмас, биз уни тажрибаси учун олиб келганмиз. Биз жорий мавсумда кўпроқ маҳоратга эътибор бермоқдамиз. Ўтган мавсумда биз Жавоҳирни таянч ярим ҳимоячи позициясида ўйнатган эдик. Ҳужум ортида эса Сильва ва Жигаури ўйнаётган эди. Жавоҳирдан ҳужум ортида ва ярим ҳимояда фойдаланишимиз мумкин. Чераннинг ўзига ҳам айтганмиз, бизга тажрибанг керак деб. Позицион ҳужумларда Черан жуда катта ёрдам бермоқда. Таркибимизни 10га яқин футболчи тарк этди, биз эса бор-йўғи 4та футболчини таркибга қўшиб олдик. Селекциямизни керакли нуқталарни ёпишга қаратдик.

- "Насаф" ҳимояланадиган жамоаларга қарши қийналади. Агар бугун "Андижон" ҳимоявий услубни танлаганда, сизда "Б" варианти бор эдими?

- Тўғри айтяпсиз. Рақиб ҳимояланса биз қийнлаяпмиз. Ушбу муаммога ечим топиш учун, биз ўзимиз ҳам бироз ортга чекиниб ўйнамоқдамиз. Шу орқали бўш зоналар пайдо бўлмоқда. Позицион ҳужумларда вазиятлар ярата оляпмиз. Баъзи ўйинларда биз ҳам ҳимояланиб, рақибни бўш зоналарни тақдим этишга мажбур қиляпмиз. Финал бир ўйиндан иборат. Бизда пенальтиларга ҳам режа бор эди. Агар ўйин серияга қадар етиб борганида, Черанни майдондан олмаган бўлардим.

- Ўтган мавсумларда сиз билан шерик сифатида Станоевич ва Муҳиддиновлар ўйнаётган эди. Янги мавсумда эса соф ярим ҳимоячи сифатида бир ўзингиз ҳаракат қиляпсиз. Бу сизга қийинчилик туғдирмоқдами?

Акмал Мозговой: - Биз анча вақтдан бери бирга ўйнаяпмиз. Мисол учун, Умар ака Эшмуродов менга кўпроқ олдинга боришни маслаҳат беради. Бу масалада муаммо йўқ.

- "Андижон" бош мураббийи Максим Шацких "Насаф" дарвозамиз олдида яхши вазиятлар ярата олмади деди. Ушбу фикрга қанчалик қўшиласиз? Сабаби учрашувдаги ягона гол ҳам пенальтидан киритилди. Шунингдек, ҳужумчиларнинг бугунги учрашувдаги ҳаракатларини қандай баҳолайсиз?

- Финалларда очиқ футбол бўлмайди. Макс нималар деди билмадим. Бундай ўйинларда юз фоизлик вазиятлар деярли содир бўлмайди. Ўйлашимча, вазиятларимиз бўлди, аммо бизга совуққонлик етишмади. Мен рақиб жамоаси яхши тайёргарлик кўрганини айта оламан. Лекин ҳамма тан олса керак, биз бугун рақибдан яхшироқ ўйнадик. Биз Суперкубокда ва Кубокда хет-трик қайд этибмизда?

- Кейинги мавсумдаги Суперкубок баҳсида ҳам "Насаф" шарафини ҳимоя қиласизми?

Акмал Мозговой: - Насиб бўлса, ҳа.

- Мавсумнинг ярми ўтиб бўлди. "Насаф" эса кузда Элит ОЧЛда иштирок этади. Жамоа таркиби ушбу жиддий мусобақага тайёрми?

- Кучайтиришимиз керак бўлган чизиқларимиз бор. Бизнинг ажойиб президентимиз бор. У киши билан бу ҳақда гаплашиб бормоқдамиз. Жамоамизни кучайтира оладиган муносиб футболчи бўлса, жамоага таклиф қиламиз.

- "Насаф"ни кучайтириш учун "катта" трансферга кўл уриш керак-ку?

- Биласиз, Ўзбекистонда "катта" трансфер қилишнинг деярли иложи йўқ. Ўзбек клубларида бундай ишни амалга ошириш имконсиз. Биз асосан эркин агентларни олиб келамиз.

- Роналду ҳозир эркин агент...

- Роналду катта эҳтимол бизни сотиб олса керак, биз уни эмас. Ўзбекистондаги клублар ўз имкониятидан келиб чиқиб ўйинчиларни олиб келади. Ўзбекистонда ҳеч ким трансфер қилмайди, барча жамоалар эркин агентларни олиб келади. Футболчи учун пул тўлай олмаймиз, яхши даражадаги эркин агентларни олиб келиб, ойлигини тўлаб борамиз.

- Жамоани тарк этадиган футболчилар ҳам борми?

- Ким кетади? Хабарлар кўп чиқаверади. Баъзида АПЛда ўйнаган супер футболчи "Насаф"га келмоқда деб ёзишади. Бундай гапларни ўқиб, мен ҳам хайрон қоламан.

- "Насаф"да дарвозабон муаммоси бордек. Иккинчи дарвозабонни қидиряпсизларми? Балки академиядан янги иқтидор чиқиб қолар.

- Ўринбосарлар жамоасида 2005да йилда туғилган иқтидорли йигитнинг ўйинини кузатиб боряпман. Уни яқинда синаб кўрамиз. Воробейга битта ўйин туфайли баҳо бериб қўйиш нотўғри. Уни Туркиядаги йиғинларда кўп синаб кўрганмиз. Воробей жамоага келишидан аввал таркибимизда терма жамоа дарвозабони борлигини ва иккинчи рақамли посбон ролига рози бўлиши ҳақида гаплашганман. Биз уни эркин агент сифатида олиб келдик. Умид Эргашев кутилмаганда жамоани тарк этди. Очиғини айтаман, клуб Умид учун кўп нарсадан воз кечган эди. Эргашев деярли бир йил давомида футбол ўйнамади, лекин клуб унга барча имкониятларни тақдим этди ва барча бонусларни тўлаб берган эди. Умид жамоани кутилмаганда тарк этгани сабабли Воробейни жалб қилдик.