Рўзиқул Бердиев: "Ал Муҳаррақ" – жуда яхши шаклланган жамоа"

ОФК кубоги-2021 финал учрашуви олдидан матбуот анжумани бўлиб ўтди. Унда “Насаф” жамоаси устози Рўзиқул Бердиев ва жамоа етакчиларидан бири Умар Эшмуродов иштирок этишди. 

Рўзиқул Бердиев: "Эртага бизни финал кутяпти. Иккала жамоа ҳам финалга осонликча етиб келмади. Шу сабабли иккала жамоа ҳам майдонда борини бериб ҳаракат қилади. 

Рақиб жамоани ўрганиб чиқдик. "Ал Муҳаррақ" – жуда яхши шаклланган жамоа. Таркибида маҳоратли футболчилари кўп. Анча тартибли ўйнайди. Йигитларга рақиб тўғрисида тўлиқ маълумот беришга ҳаракат қилдик. 

Балки иссиқ об-ҳаво бироз қийинчилик туғдириши мумкин, лекин бу баҳона бўла олмайди. Қандай қийинчилик бўлса-да, биз финал учрашувида яхши ўйнаган ҳолда, асосий мақсадимизга етишга ҳаракат қиламиз. 

Финал – битта ўйиндан иборат. Тўғри, мусобақа тўпурари, ассистлар етакчилари, кўп гол уриш каби рақамлар ва статистикалар биз тарафимиздадир. Бироқ олдинги ўйинлар натижаларини унутган ҳолда, бор эътиборимизни олдимиздаги ҳал қилувчи баҳсга қаратамиз". 

Умар Эшмуродов: "Эртага мухлисларимизни, халқимизни чиройли ғалаба билан хурсанд қилиш учун майдонга тушамиз ва боримизни берамиз".

Эслатиб ўтамиз, "Ал Муҳаррақ" ҳамда "Насаф" ўртасидаги финал баҳси эртага Тошкент вақти билан 21:00 да старт олади.