Роналду майдонга улоқтирган сардорлик боғичи аукционга қўйилади ва тушган маблағ хайрияга сарфланади

ЖЧ-2022 саралашидан ўрин олган Сербия – Португалия баҳсининг (2:2) ҳакам томонидан қўшиб берилган дақиқаларида Криштиану Роналду ҳисобга олинмаган голи туфайли ҳиссиётга берилиб, сардорлик боғичини улоқтирган ва ўйин тугашини кутмай, майдонни тарк этганди.

Манбага кўра, Белграддаги стадион ходими хайрия ташкилотига Роналдунинг майдонда қолдирган сардорлик боғичини ҳадя қилган. Энди у Сербияда аукционга қўйилади ва тушган пул умуртқа мушаги атрофиясига учраган 6 ойлик боланинг операцияси учун сарфланади. Онлайн-савдо 2-3 кун давом этиши айтилмоқда.