Роналду жуда кўп танқидларга сабаб бўлган ҳаракати бўйича изоҳ берди!

Саудия Арабистонининг "Ал Насср" клуби ҳужумчиси Криштиану Роналду "Ал Шабаб"га қарши ўйинда мухлислар томонга қараб бажарган ножўя ҳаракати бўйича изоҳ берди. Футболчининг фикрича, бу нормал ҳолат дея баҳоланиши керак.

"Мен барча клубларни ҳурмат қиламан. Ўша кадрдаги ҳаракатлар эса куч ва ғалабани акс эттиради. Мен уятли ҳеч нарса қилмадим. Европада бунга ўрганиб қолганмиз", -дейди Криштиану Роналду.

Эслатиб ўтамиз, Саудия Арабистони Про-лигасининг 21-туридан ўрин олган «Аш Шабаб» билан ўйинда (3:2) Роналду «Месси!» деб ҳайқирган рақиб мухлисларига ноўрин ишора қилган эди.

Маълумот учун, бундай ҳолат Роналду билан Саудия Арабистонида биринчи марта собир бўлмаяпти. Ўтган йилнинг апрель ойида у "Ал Ҳилол"га 0:2 ҳисобида мағлуб бўлганидан сўнг шоҳсупага чиқаётиб, мухлисларга одобсиз ишора қилганди. Шу ой бошида эса Криштиану трибунадан ўзига ташланган "Ал Ҳилол" шарфини олиб, шортисига солиб, сўнг трибунага ташлади. Ўшанда ҳам мухлислар «Месси!» деб бақиришганди.