Reuters: Кейруш ҳали бир қарорга келгани йўқ

Жаҳонга машҳур Reuters ахборот агентлигининг ёзишича, португалиялик мураббий бу борада ҳали якуний қарорга келмаган. Эрон футбол федерацияси президенти Меҳди Таж ўтган ҳафта матбуот вакиллари билан суҳбатда Кейруш жамоада қолишини айтиб ўтганди.

Бироқ бевосита мураббийга яқин манбанинг айтишича, португалиялик мутахассис ҳали якуний қарорга келмаган. "Эрон жаҳон чемпионатидаги иштирокини якунлаганидан сўнг Кейрушга янги таклиф бўлди. Федерация мураббийни Осиё Кубоги мусобақасида ҳам ўзида олиб қолмоқчи. Лекин Кейруш ҳали бир қарорга келгани йўқ. Мураббийнинг амалдаги шартномаси июль охирида тугайди. Шундан сўнг у кейинги тақдирига ойдинлик киритади", - дейди мураббийга яқин манба.

Аввалроқ Эрон ФФ раҳбари Меҳди Таж шундай деганди: "Кейруш Осиё Кубоги-2019 мусобақасига қадар терма жамоада қолади. Жаҳон чемпионатидаги ўйинимиз шуни кўрсатдики, биз тўғри йўлдан кетяпмиз. Йўқса футболчилар мамлакатга қайтганида 7 минг ишқибоз аэропортга чиқмасди. Хавотирга ўрин йўқ, Кейруш биз билан қолади. Унинг янги шартномасини яқин кунларда кўриб чиқамиз. Мана кўрасизлар, Осиё Кубогига ҳаммамиз биргаликда борамиз".