"Реал" ўтган ҳафтада Мбаппенинг ўтиши борасида битимни ёпган (тўлиқ тафсилотлар)

Marca'нинг ёзишича, Мадрид клуби ва ҳужумчи ўтган ҳафтада ўтиш борасида якуний келишувга эришишган.

Қайд этиш керакки, "Реал" бутун мавсум давомида ишончли одамлар орқали Мбаппени клубга ўтишга кўндирган, бундан ташқари улар ўртасида тўғридан-тўғри алоқа бўлмаган - Килиан 1 январдан бошлаб "Реал" ва бошқа ҳар қандай клуб билан мулоқот қилиш ҳуқуқига эга бўлган бўлса ҳам бундан сақланган.

Мбаппе душанба ва сешанба кунлари Мадридда бўлганида, "Реал" бош директори Хосе Анхель Санчес олдин режалаштирилган барча учрашувларни бекор қилди. Хусусан, бошқа футболчиларнинг агентлари Санчес билан учрашув кўчирилиши ҳақида огоҳлантирилди. "Реал" бош директори бу вақтни Мбаппе билан ҳаммасини батамом келишишга сарфлади.

"Реал" Мбаппенинг ўзи ўтиш ҳақида эълон қилмагунча, бу ҳақда хабар бермайди.

Мбаппе испан клуби билан 5 йиллик шартнома имзолайди. Унинг "Реал"даги маоши ПСЖ таклиф қилганидан анча паст бўлади. Хабар қилинишича, Мбаппе солиқлар олинганидан сўнг йилига 25 млн евро маош олади.

Кеча Мбаппе ўз қарорини 28 май куни бошланадиган Франция терма жамоаси йиғинигача эълон қилишини маълум қилганди.

23 ёшли ҳужумчи жорий мавсум ПСЖ таркибида барча мусобақаларда 44та ўйинда майдонга тушиб, 36та гол ва 21та ассист қайд этди. Унинг шартномаси жорий йилнинг июнига қадар мўлжалланган.