"Реал" Беллингемдан Фернандесга ўтди

Энди "қироллик клуби" Англия терма жамоаси аъзоси ўрнига бор эътиборини аргентиналик ярим ҳимоячи Энцо Фернандесга қаратади. 19 ёшли Жуд Беллингем Мадрид клуби учун анча вақтдан буён устувор вазифа сифатида қараб келинаётган эди. Бироқ бир қатор инглиз клубларининг қизиқиш билдириши ва рақобатда "Ливерпул"нинг қўли баланд келаётгани "Реал"ни бошқа муқобил вариант топишга ундади. Қолаверса, Беллингем трансфери 100 млн евродан анча ортиб кетиши кутилмоқда. 

21 ёшли Фернандес Аргентина терма жамоаси сафида мундиалнинг иккала ўйинида ҳам иштирок этди ва Лионель Месси 2006 йилда ўрнатган Жаҳон чемпионатида гол урган энг ёш аргентиналик номини ўзиники қилди. Энцо ўтган ёзда "Ривер Плейт"дан атиги 10 млн еврога "Бенфика"га ўтганди. 

У жорий мавсум Португалия жамоаси учун 3 та гол урди ва 6 та ассист қайд этди. Жаҳон чемпионатидаги ҳаракатлари туфайли футболчи топ-клублар эътиборини тортди ва ҳозирги жамоаси унинг трансферидан 100 млн евро атрофида фойда кўрмоқчи.