Рашид Ғофуров: "Йигитларни таний олмадим. Ҳакамлик ҳақида гапиришни истамайман ҳам"

Ўйин ҳақида

- Албатта, "Арал" жамоасини ғалаба билан табриклайман. Бугун йигитларни таний олмадим. Узоқ йўл, чарчоқ каби холатлар баҳона бўлмаслиги керак. Агар "Қўқон-1912" билан ўртоқлик учрашувидаги каби ҳаракат қилганимизда ҳам бугун ғалаба қозона олардик деб ўйлайман. Бу ерга келиб ютиб кетган жамоалар ҳам бор. "Арал" иштиёқ борасида устундек кўринди ва ҳақли ғалабага эришди.

- Ҳакамлик ҳақида нималарни айта оласиз?

- Ҳакамлик ҳақида гапириш менинг ваколатимга кирмайди. Уларнинг ишини назорат қиладиганлар бор, ўзлари баҳо беришсин. Ҳар кимнинг ўз виждонига ҳавола, ҳакамлик ҳақида гапиришни истамайман ҳам.

- Жамоалар ўртасидаги ўйинларда дуранг натижалар қайд этилаётганди. Бугунги ҳисоб кутилмаган бўлдими?

- Ҳа, бугунгача "Арал" билан ўйинларда дуранг натижалар қайд этилаётган эди. Бу жамоа билан икки мавсумдан буён тўқнаш келаётгандик. Бугун бизда ёш йигитларнинг ҳисобига ютиб кетамиз деб ўйлагандим, якун бундай бўлмади.

- Давралар оралиғидаги трансферлардан кўнглингиз тўлдими?

- Бизда Про-лига чемпиони бўлиб Суперлигага чиқиш вазифаси йўқ. Жамоа таркибида кўзга кўринган футболчиларни катта клубларга етказиб берамиз. Албатта, "Навбаҳор"нинг ўзидан ортса. Ҳозир таркибни асосан ўзимиздан, маҳаллий футболчилардан шакллантирганмиз.