“Қўқон-1912” – “Нефтчи”: 22-вилоят дербиси арафасида

Вилоятнинг икки жамоаси ўртасидаги баҳс нафақат вилоят мухлисларининг балки кенг жамоатчиликнинг юқори қизиқишига сабаб бўлиб келган. Чунки дерби мақомига эга беллашувлар ҳамиша кескин ва муросасиз ўтади.


БИРИНЧИ ДАВРДАГИ БАҲС:

“Қўқон-1912” ва “Нефтчи”  Олий лига-2016нинг илк даврасини Фарғона шаҳрида ўтказишди. 10 июнь куни “Истиқлол” стадионида бўлиб ўтган беллашувда майдон эгалари қўқонлик футболчиларни 2:1 натижасига кўра мағлуб этишганди. Дастлаб Носир Отақўзиев томонидан киритилган голга кейинчалик Шукур Пўлатов ўз дубли билан жавоб қайтарганди. Гарчи ўша баҳсда “Нефтчи” устун келган бўлсада, вилоятнинг хар иккала жамоаси ҳам ғалабага лойиқ футбол намойиш этганини айтиб ўтиш ўринлидир.


ЎЗАРО СТАТИСТИКА:

Фарғона вилояти жамоалари Олий лигада ўзаро 21 марта тўқнаш келишган. Рақамлар “Нефтчи”нинг устунлигини кўрсатмоқда. Мазкур беллашувнинг 18 тасини Фёдоров шоригдлари ўз фойдаларига ҳал этишган бўлса, 2 та ўйинда дуранг қайд этилган. Қўқон жамоаси ўзаро ўйинлар тарихида “Нефтчи”ни фақат бир марта  мағлуб этишга муваффақ бўлган. Тўплар нисбати 64-24, “Нефтчи” фойдасига. Ушбу ўйинларда “Нефтчи” 56 очкога эга чиққан, “Қўқон-1912” эса  5 очкони расмийлаштирган.


НАВБАТДАГИ ДЕРБИ

“Қўқон-1912” – “Нефтчи” ўйини жорий йилнинг  22 октябрь куни Қўқондаги “Марказий”  ўйингоҳда ўтказилинади. Ушбу беллашувга жамоалар икки хил кайфиятга етиб келишмоқда. Сўнгги турда мазкур рақиблар Тошкент жамоаларига қарши турни ўтказишди. “Нефтчи” Фарғонада “Пахтакор”ни енган бўлса, “Қўқон-1912” вакиллари “Локомотив” клуби уйидан очкосиз қайташди. Навбатдаги “вилоят дербиси” Олимжон Толибжонов бошлилигидаги ҳакамлар гуруҳига топширилди. Маълумот ўрнида,  шанба куни бўлиб ўтадагн ўйин соат 15:30га белгиланган.

Барча мухлисларни Қўқондаги баҳсга чорлаб қоламиз!

“Нефтчи” матбуот хизмати