“Қизилқум”га хориждан мураббий келади...ми?

Клубда мураббийларнинг тез-тез ўзгариши ҳам натижага салбий таъсир ўтказмасдан қолмади. Эътибор беринг, “олтин изловчилар” мавсум-2013ни учта мураббий билан ўтказди!

Аввалига Равшан Ҳайдаров кейинчалик эса Рустам Забиров ҳам маълум муддат ишлади. Иккинчи даврадан эса Юрий Лукин бошқарувни ўз қўлига олди.

Ҳар бир мураббий ўз қарашига мос тушадиган футболчиларни олиб келгани ҳам таркибини шаклланишига тўсқинлик қилганини ҳам инкор этиб бўлмайди.

Элитада қолишни сўнгги турда уддалаган “Қизилқум” раҳбарияти охирги ўйиндан кейин футболчиларга таътил берган.

Энди жамоа аъзолари 18 декабрдан ўз қароргоҳида йиғилади ва шу кундан бошлаб дастлабки йиғинга киришилади. Унда асосан маҳаллий футболчиларнинг иштирок этиши кутилмоқда.  “Насаф” ва “Олмалиқ” клубларидан ижарага олинган ўйинчилар ўз жамоаларига қайтиб кетишди.

Шу боис кейинги йил жамоанинг таркибида янгиланиш пайдо бўлиши табиий. Олий лиганинг бир қатор етакчи клублари сафида ўйнаган футболчилар билан айни пайтда музокара ўтказилмоқда.

Аммо уларнинг ўз жамоалари билан амалда шартномаси турганлиги учун номлар ошкор этилмаяпти.

Шунингдек айтишларича, катта эхтимол билан “Қизилқум”да хорижлик мураббий иш бошлаши кутилмоқда. Чунки раҳбарият Юрий Лукинга чет элдан маслаҳатчи мураббий олиб келишни ўз режасига киритганлиги тўғрисида маълумотлар бор. Бироқ бу масала ҳозирча расман тасдиқланмади.

Ҳар йили бўлганидек, бўлажак мавсумда ҳам жамоа сафида легионерлар ўйнайдиган кўринади. Бу борада ҳам айни пайтда номзодлар устида иш олиб борилмоқда. Хорижлик футболчилар билан келишувга эришилган тақдирда ҳам, улар январь ойидан бошланадиган иккинчи йиғинга келиши мумкин.

5-10 декабрь оралиғида, ПФЛ легионерлар лимитида ўзгариш қилиши кутилмоқда. Айнан шунга қараб, “Қизилқум” ҳам ўз таркибига чет элдан ўйинчи олиб келишни ўйлаб турибди.

Исломбек Рустамбеков