"Қизилқум" – "Пахтакор" ўйини санаси ўзгарди

"Қизилқум" – "Пахтакор" учрашуви 23 июнь куни бўлиб ўтади. Ўзбекистон U-23 терма жамоаси Осиё чемпионатининг финал учрашувида иштирок этади. Мазкур ўйинда бош мураббий Тимур Кападзе "Пахтакор" футбол клубининг уч нафар аъзоси хизматидан фойдаланиши мумкин: Ҳожимат Эркинов, Аббосбек Файзуллаев, Диёр Холматов. 

Регламентга кўра, миллий ва олимпия термасига уч ва ундан ортиқ футболчисини тақдим этган клубда расмий учрашув санасини ўзгартиришни сўраб, мурожаат қилиш ҳуқуқи мавжуд. "Пахтакор" айни вақтда мана шу ҳуқуқдан фойдаланади.

Аввалроқ "Пахтакор" Осиё чемпионати U-23 стартига қадар бўлган "Сўғдиёна"га қарши беллашувни ҳам бошқа муддатга қолдиришни сўраб мурожаат қилган, аммо бунда қитъа чемпионатидан кейинги баҳс борасида гап бўлмаганди. Бироқ Наманганда бўлиб ўтган Осиё Кубогининг саралаш ўйини учун ҳам "пахтакор"чиларнинг 5 нафар футболчиси жалб қилинганди: Фарруҳ Сайфиев, Одил Ҳамробеков, Азиз Турғунбоев, Ҳожиакбар Алижонов, Сардор Собирхўжаев. Мазкур футболчиларнинг айримларида кичик жароҳатлар борлигидан келиб чиқиб, "Пахтакор"га олимпия термасига жалб қилинган футболчилар хизмати ҳам зарур.

Ўзбекистон Профессионал футбол лигаси мана шундай ҳолат катта эҳтимол билан юз беришини ҳисобга олган ҳолда "Қизилқум" – "Пахтакор" ўйинини бир неча кунга суриш тақвимга катта таъсир қилмаслиги масаласини аввалдан режалаштирганди. Афсуски, "Олимпик" футбол клуби кетма-кет икки турни ўтказиб юборганидан келиб чиқиб, унинг навбатдаги ўйинларини кечиктириш имконияти мавжуд эмас. Қолаверса, "Сўғдиёна" футбол клубининг ОФК Кубогига жўнаб кетаётгани ҳам тақвим тузишда инобатга олинганини унутмаслик керак", – дейилади ПФЛ хабарида.

12-тур учрашувлари жадвали

Олимпия термасидаги "Пахтакор" ўйинчилари финалнинг эртасига Навоийда "Қизилқум" билан ўйнайдими?