Қирғизистон ўз тарихида илк бор Осиё Кубоги финал босқичига чиқди

Аслида ўтган йилнинг 5 сентябрь санасида бўлиб ўтиши керак бўлган Қирғизистон - Мьянма учрашуви сиёсий сабабларга кўра қолдирилганди. Ушбу ўйин бугун бўлиб ўтди.

Жанубий Кореянинг Инчон шаҳридаги стадионда ўтган баҳсда Қирғизистон терма жамоаси рақибини 5:1 ҳисобида таслим қилди.

Шу тариқа, саралаш баҳслари тугашига бир тур қолганида Александр Крестинин бошчилигидаги Қирғизистон терма жамоаси 2019 йил БААда бўлиб ўтадиган Осиё Кубоги финалига йўлланмани қўлга киритди. Гуруҳда дастлабки икки ўринни олган жамоалар қитъа чемпионатига боради.

Осиё Кубоги-2019 саралаши
22 март 2018 йил
Қирғизистон - Мьянма 5:1
Голлар: Шамшиев 2, Землянухин 5, 63, Виталий Люкс 74, Сагинбаев 88 - Зиав Зиен Хтет 84

Сўнгги турда Қирғизистон ўз майдонида Ҳиндистонни қабул қилади. Ушбу баҳс гуруҳда ким биринчи ўринни олишини аниқлаб беради. Мьянма эса Макао билан баҳс олиб боради.

Ҳозирга қадар Осиё Кубоги финал босқичига чиққан 21та жамоаниннг номи маълум бўлди: БАА, Қатар, Жанубий Корея, Япония, Таиланд, Саудия Арабистони, Австралия, Ўзбекистон, Эрон, Сурия, Ироқ, Хитой, Ҳиндистон, Ливан, Иордания, Вьетнам, Фаластин, Уммон, Баҳрайн, Туркманистон, Қирғизистон.

Яна учта йўлланма соҳиби 27 март куни бўлиб ўтадиган сўнгги турдан кейин маълум бўлади.