"Қайрат" бош мураббийи нима учун Жасур Жалолиддинов иккинчи тайм бошида алмаштирилганига изоҳ берди

1:1 ҳисобида якун топган беллашувда ҳамюртимиз Жасур Жалолиддинов 45 дақиқа ҳаракат қилиб, иккинчи тайм бошида алмаштирилди. Ўйиндан кейинги матбуот анжуманида мезбонлар бош мураббийи Қурбон Бердиев шундай деди:

- Кутганимдек оғир ўйин бўлди. Баъзи футболчиларимиз жароҳат олишди. Алиқулов ўз позициясида ўйнамади. Ёшлар эса умуман олганда ёмон ўйин кўрсатмади. Агар Баньяк сафимизда бўлганида биз бошқача схемада - яъни тўрт нафар ҳимоячи билан ҳаракат қилган бўлардик. 

- Жасур Жалолиддиновнинг ўйинини қандай баҳолайсиз ва нима учун алмаштирилди?

- Айтишим мумкинки, ундаги босим ва ҳаяжон сезилиб турди. Жасурда салоҳият жуда юқори, лекин бугун ўз имкониятларини 50 фоиз ҳам кўрсата олмади. Баъзан "йўқолиб" қолди, лекин янада кучли ўйин намойиш эта олишига ишонаман. 

Маълумот учун: Жасур Жалолиддинов аввалги икки турда қайдномага киритилган, бироқ майдонга тушмаганди. 3-турга келиб у Қозоғистон чемпионатидаги дебютини нишонлади. Куйинги баҳсларда моҳир ярим ҳимоячимиздан янада ёрқин ҳаракатлар кутиб қоламиз. 

P.S. "Қайрат" 3та турдан сўнг 7 очко билан турнир жадвалида пешқадамлик қилмоқда.