ПРО-Лига, “А” гуруҳи. Энг тезкор гол ва бошқалар ҳақида

Футбол голлар билан ўзига хос жозиба бағишлайди. Голсиз ўйин якунда нурсиз дурангга олиб келади.

“А” гуруҳидаги 4та ўйинда мухлислар жами 11та голга гувоҳ бўлди. Шундан 8тасини мезбон жамоалар киритган бўлса, қолган 3та гол меҳмонлар ҳисобига ёзилди.

Биринчи таймда 5та гол киритилди. Иккинчи бўлимда эса яна 6та тўп киритилган.

Турнинг энг тезкор голини Риза Айвазов киритди. “Истиқлол” ҳужумчиси “Орол”га қарши баҳсда 7-дақиқадаёқ рақиб дарвозасига тўп киритиб, учрашувда биринчи бўлиб ҳисобни очишга эришди.

“Шўртан” футболчиси Муҳаммадали Абдураҳмоновнинг 81-дақиқада “Хоразм” дарвозасига киритган тўпи турнинг энг сўнгги голи бўлди.

Ушбу турда битта дубл қайд этилди. “Шўртан” аъзоси Исломбек Бойсариев “Хоразм”га қарши баҳсда 2та тўп киритишга эришди.

Шунингдек 1-турда пенальти ҳам қайд этилди. “Орол” – “Истиқлол” учрашувида бош ҳакам Фирдавс Норсафаров 14-дақиқада мезбонлар дарвозасига 11 метрлик нуқтани кўрсатди. Меҳмонлар ҳимоячиси Абдухолиқ Қурбонов бундан унумли фойдалана олди.