ПРЕВЬЮ. ОКМК бугун "Локомотив" стадионида тарихий ғалабани қўлга киритадими ёхуд шогирдлар устозга қарши

1. Турнир жадвал

ОКМК айни пайтда 8 очко билан турнир жадвалида 8-ўринни эгаллаб турибди. "Локомотив" эса бир поғона пастда ва унда ҳам 8 очко мавжуд. Бу ерда фарқ тўплар нисбатида қолмоқда. Бугунги ғалаба икки жамоадан бирини экваторга олиб чиқиши мумкин. 

2. Улар собиқ жамоасига қарши 

Жорий мавсум қишки трансфер ойнасида ўтган мавсум ОКМКда тўп тепган бир нечта футболчилар "Локомотив" билан шартнома имзолади. Санжар Турсунов, Анзур Исмоилов, Муҳаммаданас Ҳасанов, Суҳроб Султонов, Жасур Ҳакимов бугун собиқ жамоасига қарши майдонга чиқади. Турсунов етакчилигидаги жамоа ОКМКГа қандай қаршилик кўрсатиши барча учун қизиқ бўлиши табиий. Шунингдек, "темирйўлчилар" устози Александр Стоймирович ўтган йили Олмалиқда Қосимовнинг мураббийлар штабида фаолият олиб борганди. 

3. Ўзаро ўйинлар. ОКМК тарихий ғалаба остонасида 

Жамоалар шу кунгача Тошкентда 14 маротаба тўқнаш келишган. Устунлик мутлақо мезбонлар томонида, 12 ғалаба. Фақатгина 2 та ўйинда томонлар муроса кўчасини танлашган. ОКМК сўнгги маротаба 2021 йил "Локомотив" майдонидан очко билан қайтган (1:1). Сўнгги учрашув эса Олмалиқда бўлиб ўтган, унда олмалиқликлар 4:0 ҳисобидаги ғалабани тантана қилган. ОКМК ўз тарихида "Локомотив" стадионида ғалаба қозонмаган ва бугун улар бу ишни уддасидан чиқиши мумкин. 

4. Мутахассис фикри

Жаъфар Ирисметов - ОКМК барқарор ўйин кўрсата олаётгани йўқ. 2-3 та турда яхши таассурот қолдиришди. "Насаф" билан ўйинда имкониятни бой беришди. 2 та бир-бирига мос жамоа. ОКМК рақибига нисбатан тажрибалироқ. "Локомотив"да эса ёшлар бор. Тахминимча, ўйин дуранг натижа билан якунланади.

5. Равшан Абдувоҳидов 4 йилдан сўнг "Локомотив" ўйинида ишлайди 

Ушбу баҳсни бошқариш учун Равшан Абдувоҳидов бошчилигидаги ҳакамлар гуруҳи тайинланган. Қайд этиш мумкинки, шу кунгача мазкур ҳакам 3 та ўйинда ишлаган ва уларнинг 2 тасида "темирйўлчилар" 2 та ғалаба қозонган, 1 та ўйин дуранг билан якунланган. Равшан Абдувоҳидов сўнгги маротаба 2020 йил 25 сентябрь куни "Локомотив" иштирокидаги баҳсни бошқарган эди.