Пишурнинг ўғли "Жирона"га ўтмоқда

Инсайдер Фабрицио Романо маълумотларига қараганда, "Жирона" 20 ёшли украиналик футболчининг трансфери бўйича келишувга эришган. Венгрия жамоаси ҳужумчини сотиш орқали 1 млн евро даромад қилади.

Олександр Пишур 2025 йилнинг февраль ойида 150 минг евро эвазига "Дьирмот"дан "Дьор" жамоасига ўтганди. 

Ҳужумчи жорий мавсум барча мусобақаларда 20 ўйин ўтказиб, 4 та гол урди ва 1 та голли узатма амалга оширди. Transfermarkt портали Пишурнинг бозордаги нархини 250 минг евро деб баҳоламоқда.

Кичик Пишур ўтган йили U-20 Жаҳон чемпионатида ҳам қатнашган ва 1 та гол урганди. Украина ёшлари мундиалда гуруҳдан чиққан ва плей-оффда Испаниядан енгилган эди.

Маълумот ўрнида, у 2013-14 йилларда "Бунёдкор", 2016 йил "Навбаҳор", 2017 йил эса "Шўртан"да тўп тепган ҳужумчи Олександр Пишурнинг ўғли саналади.