ПФЛ ОФКга мурожаат қилиб, халқаро талаблар ҳимоя қилинишини сўради

Сир эмаски, ЎзПФЛ ўз тақвим режасини анча аввал эълон қилган бўлиб, унда барча тур ўйинлари дам олиш кунларига режалаштирилган. Шунингдек, ЖЧ-2026 саралашига миллий терма жамоанинг пухта ҳозирлик кўриши инобатга олиниб, ЎФА ва ЎзПФЛ келишган ҳолда Суперлиганинг 1 та турини июль ойига қадар қолдирганди. Бунинг эвазига миллий терма жамоа Абу Дабидаги ҳал қилувчи ўйинга эртароқ жўнаб кетиш ва тайёргарлик кўриш имкониятига эга бўлганди. Яъни, ЖЧ йўлланмаси қўлга киритилиши учун барча 16 клуб июль ойидаги иссиқ об-ҳавода тур ўйинларини ўтказишга рози бўлган.  

ФИФА кунларидан ташқарида ўтказиладиган ўйинларга эса легионер футболчиларни жалб қилишнинг имкони йўқ. Малайзия айнан шу сабаб туфайли CAFA мусобақасида иштирок этмайдиган бўлди. Эрон эса мазкур мусобақага легионер футболчиларсиз келишни режалаштирмоқда. ПФЛ талқинига кўра, бундай ҳолат Ўзбекистон миллий терма жамоаси учун ҳам манфаатли эмас. Икки йил аввал ФИФА кунларидан ташқарида ўтказилган мусобақа ҳаттоки Сречко Катанецнинг ҳам эътирозига сабаб бўлгани борасида бизда маълумотлар бор. Сабаби Катанец даража жиҳатдан юқорироқ турувчи УЕФА терма жамоалари билан ўртоқлик ўйинлари ташкил қилишни CAFA мусобақасидан фойдалироқ деб ҳисоблаган.

Куз ойида бир эмас 3 та ФИФА куни борлиги, шунингдек, "Насаф", "Андижон" каби клублар халқаро мусобақада иштирок этиши тақвим тузишни бироз мураккаблаштиради. ЎзПФЛга кўра, агар ФИФА кунларига қатъий амал қилинмаса, бу бора-бора Суперлига декабрь ойининг кейинги 10 кунлигига қадар чўзилиб кетишига олиб келиши мумкин. Иқтисодий ҳолатдан келиб чиқиб, Суперлига клублари ўз футболчилари билан ноябрь ойи сўнгига қадар шартнома тузади. Бироқ ўйинлар декабрга қадар қолиб кетса, шартномаларга қўшимча ўзгартиришлар киритиш Суперлиганинг ҳар бир клуби учун тахминан 70-90 минг АҚШ долларига тушиши мумкин. Умумий ҳисобда 1 миллион доллардан ошиб кетиши мумкин бўлган компенсация клубларга CAFA томонидан тўлаб берилмаслиги табиий. 

Шундан келиб чиқиб, ПФЛ ҳар қандай ҳолатда ҳам масалага профессионал нуқтаи назардан ёндашиш ва ФИФА низомларини ҳурмат қилишни талаб қилмоқда.