Пешқадамлар жанги: “Реал Сосьедад” – “Атлетико” ва 15-турнинг бошқа учрашувлари превьюси

“Boxing day” аталмиш жангларни эсга олганимизда беихтиёр футболга бўлган муҳаббатимиз ошиб бораверади. Испания чемпионатининг 15-тур учрашувлари ҳам ҳафтанинг сешанба оқшомидан старт олади. 2-3 кун авва ўйин ўтказган жамоалар яна майдонда саф тортишади, хуллас буёғига жанг! Кеча душанба эди ва табиийки иш жараёнлари билан бўлиб 14-турда нималар бўлгани ёдингиздан кўтарилган бўлиши мумкин. Биз эса сизга ўтган турни бирров эслатиб ўтамиз.

“Атлетико Мадрид” пешқадамликни ўзида сақлаб қоладиган бўлди. “Эльче”га қарши учрашувда мадридликлар 3:1 ҳисобида ғалабага эришишди. “Реал Сосьедад”га нима бўляпти? Жамоанинг мавсум аввалидаги иштиёқи қаёққа йўқолди? Ўтган турда “Леванте” меҳмони бўлган жамоа мағлубиятга учради (2:1). Биз марказий дея баҳолаган ўйин – “Барселона” – “Валенсия” учрашувида эса жанговар дуранг қайд этилди, 2:2. Мадриднинг “Реал”и эса ўз мухлистларини қувонтиришда давом этмоқда. 14-турда “Эйбар” меҳмони бўлган жамоа 1:3 ҳисобида ғалаба қозониб, 3 очко эгаси бўлди.

Бизни олдинда кутаётган 15-тур ўйинлари анонси билан эса қуйида танишишингиз мумкин.

Тур безаги: “Валенсия” – “Севилья”

14-турда ҳар икки жамоа ҳам дуранг ўйнади. “Валенсия” Каталониядан бир очко билан ортга қайтган бўлса, “Севилья” ўз уйида аутсайдер “Вальядолид” билан 1:1 ҳисобидаги дуранга имзо чекди. Меҳмонлар айни вақт турнир жадвалида 20 очко билан, 7-ўринни банд этиб туришган бўлсалар, валенсияликлар 15 очко билан 13 ўринда. Ушбу ўйиндаги мезбон жамоа вакиллари мағлуб бўлишса пастка қулашда давом этаверади. Аслида очко икки жамоа учун ҳам сув ва ҳаводек зарур. 22 декабр, соат 21:30 да бўлиб ўтадиган ўйин барчасига ойдинлик киритиб беради.

Ўзаро ўйинлар: Ла Лига доирасида ўтказилган 150 ўйиндан 69 тасида “Валенсия”, 54 тасида “Севилья” жамоаси ғолиб бўлишган. 27 ўйинда эса томонлар муроса кўчасини танлашди.

Жамоаларнинг жароҳатланган футболчилари:
Кевин Гамейро, Яспер Силлессен, Уго Гилямон, Тони Лато (“Валенсия”). Серхио Эскуредо, Томаш Ватслик, Мунир Эль-Хаддади (“Севилья”).

Марказий ўйин: “Реал Сосьедад” – “Атлетико Мадрид”

Ўтган тур олдидан турнир жадвалидаги 3 жамоанинг очколари бир хил – 26 тадан эди. Юқорида 14-турни эслаганимизда соседадликларнинг мағлуб бўлишганини ҳамда “Атлетико”нинг ғалабага эришганини таъкидладик. Натижада эса “Реал Сосьедад” мадридликлардан 3 очко орқада. 2-поғонада кетаётган “Реал Мадрид”да ҳам 29 очко мавжуд. Ушбу ўйиндаг асосий интрига мезбонларнинг ғалабаси уларни рақиблари билан бир хил очко тўплашларига имконият берса, мадридликларнинг мағлубияти уларни 1-ўриндан тушириб юбориш эҳтимоли мавжудлиги. Шуларнинг ўзи бу ўйинни 15-тур марказий баҳсига айлантириши табиий. 22 декабр 23:45 да старт бериладиган ўйинда ҳақиқий жанг кечиши аниқ.

Ўзаро ўйинлар: Жами ўтказилган 144 ўйиндан 71 тасида “Атлетико Мадрид”, 44 тасида эса “Реал Сосьедад” ғалабага эришган. 29 баҳс эса дуранг билан якунланган.

Жамоаларнинг жароҳатланган футболчилари:
Асер Ильярраменди, Аднан Янузай, Аритс Аранбарри, Микел Оярсабал, Лука Сангали, Хон Алдалур, Мигел Анхел Мойя, Аритс Элустондо, Давид Силва (“Реал Сосьедад”). Эктор Эрера, Иво Грбич (“Атлетико Мадрид”).

Қувноқ кечиши кутилаётган ўйин: “Вильярреал” – “Атлетик Бильбао”

Сўнгги турда икки жамоанинг ҳам ғалаба эришганини кўриб шундай ном танладик ушбу баҳсга. “Вильярреал” “Осасуна”ни, “Атлетик Б” эса “Уэска”ни мағлуб этиб очколарини кўпайтириб олишди. “Атлетик Бильбао” агар бу баҳсда 3 очко йўқотгудек бўлса уларни хавфли зонага тушиб кетиш эҳтимоллари ҳам мавжуд бўлиб қолади. “Вильярреал”нинг ғалабаси эса жамоани “кучли учлик”ка киришига замин яратиши мумкин. Албатта, бу бошқа бир баҳсга ҳам боғлиқ, бироқ бу ўйин ҳам ўзига яраша қизиқ, қувноқ ҳамда голларга бой бўлиш эҳтимоли бор. 22 декабрдан 23 декабрга ўтар кечаси 02:00 да бўлиб ўтадиган мазкур ўйин ширин уйқудан кечишга арзийди.

Ўзаро ўйинлар: Ушбу баҳс Ла Лига доирасида ўзаро 41 ўйин бўлади. Бунгача бўлган ўйинларнинг 17 тасида “Вильярреал”, 11 тасида “Атлетик Бильбао” ғолиб бўлган. 12 баҳс эса дуранг билан якунига етган.

Жамоаларнинг жароҳатланган футболчилари:
Пако Алкасер, Алберто Морено, Францис Коклен, Карлос Бакка, Висенте Иборра (“Вильярреал”). Перу Ноласкоайн (“Атлетик Бильбао”).

Аутсайдер “Вальядолид” омадсизликларга учраётган “Барселона”га қарши

23 декабрга ўтар кечаси соат 02:00 да бўлиб ўтиши режалаштирилган мазкур ўйиннинг энг қизиқ томони хавфли зонада юрган “Вальядолид” ўз майдонида бу мавсум очко йўқотишларга кўникиб қолган “Барселона”га қарши ўйнайди. “Вальядолид” 14-турда “Севилья” билан меҳмондаги баҳсда 1:1 ҳисобидаги дурангга имзо чеккан. Каталонияликлар эса “Валенсия”ни енга олмади. Қуйи ўринлардан юқорига интилаётган майдон эгалари мазкур ўйинда ҳам очко олиш, балки ғалаба қозонишга интилишади. Бироқ Роналд Куман шогирдлари ҳам бунга тинчгина йўл қўйиб беришмайди.

Ўзаро ўйинлар: Жами ўтказилган 89 ўйиндан 59 тасида “Барселона”нинг қўли баланд келган. 14 баҳс эса “Вальядолид” ғалабаси билан якунлаган. Яна 16 учрашувда эса томонлар муроса кўчасини танлашган.

Жамоаларнинг жароҳатланган футболчилари:
Хоакин Фернандес, Кико Оливас, Сайди Жанко (“Вальядолид”). Ансу Фати, Серхи Роберто, Жерар Пике, Усман Дембеле (“Барселона”).

Мағлубият нималигини билмаётган “Реал Мадрид” “Гранада”га қарши

Ўйин афиша жиҳатдан бироз енгил кўринар, лекин рақамлар гапиганда интрига ошиб бораверади. “Гранада” ҳозирги кунда “Барселона” билан бир хил: 21 очко тўплаган ҳолда 6-поғонани банд этиб турибди. Мадридликлар эса “Атлетико”ни қувиш билан овора. Гарчи очколар бўйича тенг бўлишса ҳам, ўйинлар сони бўйича “Атлетико” яхши натижага қайд этган. “Реал Мадрид” эса ўз майдонидаги ўйинда очко йўқотмаган тақдирда ҳам 1-ўринга чиқишлари учун “Реал Сосьедад” Мадриднинг бошқа бир клубини енгиши керак бўлади. 23 декабр 23:45 да бошланадиган баҳс қизиқарли кечиши шубҳасиз.

Ўзаро ўйинлар: 48 ўйин ўтказилган икки жамоа ўртасида. Шуларнинг 34 тасида “Реал Мадрид”, 6 тасида эса “Гранада” ғолиб бўлга. 8 ўйинда жамоалар 1 очкога эга чиқишган.

Жамоаларнинг жароҳатланган футболчилари:
Иско, Винисиус Жуниор (“Реал Мадрид”). Анхел Монторо, Нейдер Лосано, Виктор Диас, Кини, Феде Вико (“Гранада”).

Шунингдек, 15-турда қуйидаги ўйинлар ҳам ўтказилиши режалаштирилган:

22.12 21:30 (Тошкент вақти) “Эльче” – “Осасуна”
22.12 23:45 (Тошкент вақти) “Уэска” – “Леванте”
23.12 21:30 (Тошкент вақти) “Хетафе” – “Сельта”
23.12 02:00 (Тошкент вақти) “Бетис” – “Кадис”
23.12 02:00 (Тошкент вақти) “Алавес” – “Эйбар”

Янги йил яқин! Мазкур баҳслардаги кўрсатиладиган ўйинлар ҳам янги йилга совға бўлиши мумкин. Совуқ қиш кунларида ёқимли томоша тилаймиз сизга, қадрли футбол ишқибозлар!

Оғабек Самисов тайёрлади