Педру Морейра "Ал Ҳилол" устидан қозонилган тарихий ғалабадан сўнг нималар деди? (тўлиқ матбуот анжумани)

"Кеча айтиб ўтганимдек қийин баҳс бўлди. Биз бугун жуда кучли жамоага қарши тартибли ўйин намойиш эта олдик. "Ал Ҳилол" биздан кўра кўпроқ вақт давомида тўпга эгалик қилиши кутилган эди. Кеча биз ҳимоявий футбол намойиш этамизми дея қизиқишганди. Бугун биз кўзлаган ўйин қандай бўлганини билиб олдингиз. Биз бор эътиборимизни ўйинни тўғри ташкил этишга қаратгандик. Бугун футболчиларимиз жуда яхши ўйин намойиш этишди. Биз кўпроқ ҳимояга эътибор бериб, рақибни бўш қолган зоналарда ушлашга ҳаракат қилдик. Дастлабки 30 дақиқани "фантастик" тарзда ўтказдик. Энди бизни Риёддаги учрашув кутиб турибди. Сафардаги баҳс бугунгидан ҳам қийинроқ кечиши аниқ. Футболчиларга раҳмат айтаман ва улар билан кийиниш хонасида ҳам гаплашдим. Кейинги учрашувга тайёргарлик кўришни бошлаймиз" - деди Педру Морейра.

"Бундай совуқ кунга қарамай бизни қўллаб-қувватлаган мухлисларга раҳмат айтаман. Рақиб Осиёнинг энг кучли жамоаларидан бири эди. Бош мураббийимизнинг тактикаси туфайли бундай натижага эришдик, аммо ҳали жанг тугамади. Энди кейинги ўйинга тайёргарлик кўришимиз керак" - дея айтиб ўтди Абдурауф Бўриев бугунги баҳс ҳақида.

- Бугунги ғалаба билан табриклайман. Жамоангизда кейинги баҳсга тайёргарлик кўриш учун яна бир ҳафта вақт бор. Сафар учрашуви ҳақида қандай фикрдасиз? Риёдда бўлиб ўтадиган учрашувда "Ал Ҳилол" ўзига қулай шароитда бўлади. Бугунги учрашувдан келиб чиқиб, яна нималарни ўзгартиришингиз мумкин?

- Дастлаб, бугунги ғалабадан хурсанд бўлиб олайлик(кулади). Кейин эса, сафар баҳси ҳақида ўйлаймиз. Бугун футболчиларим ўз ҳаракатлари билан рақибга гол уришга бермади. Бундай майдон рақиб учун ноқулайлик туғдиргандир, аммо биз ҳам худди шу майдонда футбол ўйнадик. Биз 3-4та яхши вазият яратдик. Рақибимиз эса биздан кўпроқ имкониятларга эга бўлди, аммо улар бугун гол уриша олишмади. Шу боис, жамоамнинг айни дамдаги ҳолати ҳақида ижобий фикрдаман. Сафарда баҳс ҳам қийин кечади. Катта мухлислар билан туладиган стадион ва умуман бошқа кайфиятдаги рақиб. Бизни бундай об-ҳавода ёлғизлатиб қўймаган мухлисларимиздан миннатдорман. Тошкентдаги ўйинларда иштирок этиш жуда ёқимли, сабаби бу ерда "фантастик" атмосфера бор.

- Брайан Риаскоснинг ҳолати ҳақида гапириб ўтсангиз...

- Риаскосни ўйиндан келиб чиқиб захирага олдик. У айрим бир вазиятда чарчаб қолган ёки қайсидир вазиятда прессингда яхшироқ қатнашмаган бўлиши мумкин. Бу ўйиндаги ҳолатдан келиб чиқиб қабул қилинган қарор.

- Кеча ўйиндан олдинги матбуот анжуманида Ўринбоев ҳақида берилган савол ижтимоий тармоқларда анча кўп гап-сўзларга сабаб бўлди. Ўринбоевни кейинги учрашувларда майдонда кўришимиз мумкинми?

- Биз майдондаги футболчилар ҳақида гапиришимиз керак, менинг назаримда. Улар бунга лойиқ. Мен майдонга энг яхши ва айни дамда асосий таркибдан жой олишга энг лойиқ футболчиларни танлайман. Бу менинг қарорим. Мен Ўринбоев билан бор-йўғи икки кун ишладим, холос. Бундай қисқа вақт давомида жамоа билан бирга бўлган футболчини майдонга туширишим бошқа футболчиларга нисбатан адолатсизлик бўларди. Яна бир бор такрорлайман, Ўринбоев ўз ўрни учун курашиши керак ва у барчасини исботлашга қодир. Мен учун футболчиларни алмаштиришдан осон ишнинг ўзи йўқ, лекин биз жамоа ўйинига мос келадиганларга кўпроқ мурожаат қилишимиз керак. Собирхўжаев бугун ўйнамади, аммо унинг ўрнини Бўриев муваффақиятли эгаллади. Абдурауф жуда яхши ўйин намойиш этди. Бу ҳақда барча футболчилар билан гаплашганман. Масалан, ёнимда ўтирган Бўриев билан биринчи кундаёқ бу ҳақда келишиб олганмиз. Ҳар бир футболчи ўз ўрни учун курашиши керак.

Абдурауф Бўриевга савол

- Абдурауф, сизнинг фикрингизча, бугунги учрашувнинг қайси жабҳасида "Пахтакор" рақибдан устунлик қилди?

- Сўнгги 5-10 дақиқани ҳисобга олмасак, биз тўлиқ ўйин давомида рақибдан қолишмадик. Сўнгги дақиқаларда ҳисобни ушлаб қолиш учун ўйнагандек туюлган бўлиши мумкин. Ўйин сўнгида рақиб босим қилди. Ҳужумчиларга узун паслар ва қанотдан паслар орқали ҳужум қилишди. Биз уларга деярли имконият бермадик ва шу сабабли яхши натижага эришдик, деб ўйлайман.

- "Пахтакор" ўзининг энг яхши ўйин даражасига чиқишга интилмоқда, деб айтиб ўтдингиз. Сизнингча, "Пахтакор" тахминан қачон ўзининг ўзининг энг яхши спорт формасида бўлади. Шунингдек, бугун жамоангиз намойиш этган ўйинга баҳо бериб ўтсангиз. Масалан, ўн баллик баҳолаш тизимида бугунги ўйинга неча баҳо берган бўлардингиз.

- Бугунги баҳс бизнинг бор-йўғи учинчи расмий учрашувимиз эди. Биз мураббийлар штаби билан стратегия ишлаб чиққанмиз. Биз ўз ғояларимизни амалга оширишимиз керак. Ҳозирги кунда намойиш этаётган ўйинимиздан қониқиш ҳосил қиляпман. Дастлабки учта баҳс ҳақида ўйлайдиган бўлсак, таассуротларим ижобий. Бугун биз оддий жамоага қарши ўйнамадик. Биз дастлабки дақиқаларда рақибга имконият бермадик. Биз ушбу босқичга қадар етиб келишни жуда истагандик. Биласиз, кейинги мавсум ОЧЛда иштирок этмаймиз. Бизнинг мақсадимиз ушбу мусобақага имкон қадар тезкорроқ қайтиш.

Ўзбекистон футболи ривожланаётган мамлакат. Мен "Пахтакор"дан таклиф олганимда, мамлакатингиз футболини ўрганиб чиққан эдим. Ўзбекистонда ёш ва иқтидорли футболчилар кўп. Бу ҳақда аввал ҳам айтгандим. Терма жамоангиз мундиалга йўл олишига тилакдошман. Менинг меҳнатларим меваси ўзбек футболига фойда келтиришини истайман. Мен Ўзбекистон терма жамоасининг Жаҳон чемпионатига чиқиш йўлидаги кичкина ҳиссамни қўшишга ҳаракат қиламан, агар ушбу вазифани бажара олсам, мен хурсанд бўламан.