“Пахтакор” янги футболчиларни таништирди

Унда клуб бош директори Рустам Кўпайсинов, спорт директори Григорий Цейтлин ҳамда янги футболчилар қатнашишди.

Рустам Кўпайсинов: “Янги мавсум бошланмоқда. Клубга янги келган футболчиларни таништирамиз. Улар орасида анчадан буён таркибимизда кўришни истаган футболчилар бор, Декабрь ойида Тошкентда илк йиғинни ўтказдик. БААда икки ҳафталик йиғин ҳам ўтказиб қайтдик. Тошкентдаги йиғин орқали янги мавсумга сўнгги тайёргарликни олиб бордик. Мақсадимиз ўзгармайди, доимгидек барча совринлар учун курашамиз”.

Григорий Цейтлин: “Жамоа учта тўлиқ йиғин ўтказди. Тошкент, Дубай ва Тошкентда ўйинлар ўтказдик. Барча йиғинларда ўз олдимизга қўйилган вазифаларни бажардик. Футболчилар синовдан ўтказиб олинди. Бу йилги мақсадимиз ҳар бир ўйинда ғалаба учун майдонга тушиш”.
Шундан сўнг янги футболчиларга жамоа формаси топширилди.

Бир неча йил давомида “Пахтакор”да ўйнаб кўплаб совринларга эга бўлган дарвозабон Темур Жўраев 12-рақамда ўйнайди. “Шўртан”дан жамоа сафига қўшилган Сухроб Бердиев 19, “Навбаҳор”дан келган ярим ҳимоячи Азим Аҳмедов 7, ўтган йилги мавсумни Эронда ўтказган Ойбек Қиличев “Пахтакор”га қайтди ва 35-рақамни танлади. Ёш ва умидли ҳужумчи Акобир Тўраевга эса 17-рақам топширилди.

- “Бухоро” бу мавсумда ўз олдига катта мақсадлар қўйган, нима учун сиз “Пахтакор”ни танладингиз?
Акобир Тўраев: - Ёшлигимдан “Пахтакор”да ўйнашни орзу қилардим. Бу мамлакатимизнинг энг кучли ва шонли клуби ҳисобланади. Жамоа ғалабаларига ўз хиссамни қўшмоқчиман.

- Таркибни бир қатор еткачилар тарк этишди. Бу сизни ҳавотирга солмаяптими?
Рустам Кўпайсинов: - Йўқ. Тўғри бир неча футболчилар кетишди, аммо уларнинг ўрнини тўлдириш ишлари ҳам олиб борилди. Барчасини янги мавсумдаги натижалар кўрсатиб беради.

- Жамоага олиб келинган футболчилар ҳақида нима дея оласиз?
Григорий Цейтлин: - Азим Аҳмедов аслида бизнинг жамоадан “Навбаҳор”га ўтганди. Ўшандаёқ биз бу клуб раҳбарияти билан оғизаки келишувга эришгандик. Яъни Аҳмедов бир неча йилдан сўнг уни сотиб олиш ҳуқуқи бор эди. Суҳроб Бердиевни анчадан буён кузатиб келдик. Уни олий лиганинг етакчи клубларига қарши ўйинлари орқали кузатдик. Акобир Тўраев ҳам ёшлигида “Пахтакор” жамоаси аъзоси бўлганди. Аммо ёш бўлгани учун Бухорода ўйнади. Энди ўз сафимизга қўшиб олдик.  Ойбек Қиличев ва Темур Жўраевни эса

- Лобанов кетгач жамоа дарвозабонлари орасида рақобат камайгандек. Бу йил биринчи дарвозабон бўлиш имкониятингизни қандай баҳоласиз?
Темур Жўраев: - Жамоада асло рақобат камайгани йўқ. Сабаби Рибкин ва бир нечта ёш посбонлар бор. Шу боис биринчи рақам бўлиш жуда қийин бўлади. Уйимга қайтганимдан хурсандман.

- Жамоа трансферлар орқали ўз молиявий ҳолатини яхшилаб олдими?
Рустам Кўпайсинов: - Фақатгина Егор Кримецнинг трансфери орқали маълум сумма ишлаб олдик. Александр Лобановни эса Эронга бепул қўйиб юбордик. Махарадзе, Мерзляков ва бошқа футболчилар жамоамизни эркин агент сифатида тарк этишди.

- Энди “Пахтакор” жамоаси мухлислари сиздан Одил Аҳмедовдек ўйин кутишади. Бунга тайёрмисиз?
Азим Аҳмедов: - Албатта ўз ўйиним орқали мухлисларнинг ишончини оқлашга ҳаракат қиламан. “Пахтакор” билан катта ғалабаларга эришмоқчиман.

- Жамоага келган ҳужумчилар Игорь Сергеевнинг соясида қолиб кетарди. Сиз бундан қўрқмадингизми?
Суҳроб Бердиев: - Тўғри ҳужум чизиғида рақобат жуда кучли. Аммо мен рақобатдан қўрқмайман. Ҳужумчилар барчамиз бир мақсад йўлида бирлашамиз.

Нарзулла Сайдуллаев