"Пахтакор" - "Ал Айн": Ўйиндан олдинги маълумотлар

Қуйида мазкур учрашув билан боғлиқ баъзи маълумотларни келтириб ўтамиз.

- "Пахтакор" ОЧЛда 12-бор иштирок этмоқда. Бу мусобақанинг рекорди ҳисобланади. "Ал Айн" эса ўнинчи марта ОЧЛда тўп сурмоқда.

- Ҳар иккала жамоа 2010 йил бир гуруҳда кураш олиб борган ва ҳар иккала ўйинда ҳам "Пахтакор" ғалаба қозонган: уйда 3:2, сафарда 1:0.

- "Пахтакор" таркибида Игорь Сергеев билан Кахи Махарадзе иккитадан гол урган ҳолда жамоанинг энг яхши тўпурарлари бўлиб туришибди.

- 2010 йил "Пахтакор" "Ал Айн"га қарши кураш олиб борган пайтда Станислав Андреев, Шерзод Каримов, Камолиддин Тожиев ва Мурод Холмуҳамедов сингари футболчилар ҳаракат қилишган. Биласиз, бу ўйинчилар ҳозир ҳам "Пахтакор" аъзоси ҳисобланади.

- "Пахтакорчилар"дан Игорь Сергеев, Егор Кримец ва Даврон Ҳошимов ҳисобида биттадан сариқ карточка бор. Агар улар яна огоҳлантириш оладиган бўлса, навбатдаги турни ўтказиб юборишади.

- "Пахтакор" олий лигани ўз майдонида "Олмалиқ"қа қарши 1:1 ҳисобидаги дуранг билан бошлади.

- "Ал Айн" бунгача икки марта Ўзбекистонга келган. 2006 йил жамоа "Машъал"га қарши 1:1 ўйнаган бўлса, 2010 йилги мавсумда "Пахтакор"дан 2:3 ҳисобида мағлуб бўлган.

- "Ал Айн" клубининг беш нафар футболчиси - Муҳаммад Абдулраҳмон, Моҳанад Салем, Ли Мюнг Жу, Аҳмед Барман ва Саеед Мусаббеҳ ҳисобида биттадан сариқ карточка мавжуд.

- "Ал Айн" миллий чемпионатда жума куни "Ал Дафра" меҳмони бўлиб, 1:1 ҳисобини қайд этди.

Х.Холиқов тайёрлади.