Павел Матяш: "Ўзбекистон узоғи билан ярим финалгача бориши мумкин"

"Терма жамоамиз ўйиндан-ўйинга кучайиб бормоқда. Хитой билан ҳам, Жанубий Кореяга қарши баҳсда жамоамиз яхши кўринди. Лекин якунда натижани сақлаб қолишга бизга нимадир етишмаяпти. Кейинги учрашувда нафақат ўйин борасида, балки натижа жиҳатдан ҳам ўзимиз учун 3 очкони қўлга киритамиз, деган умиддаман. Гуруҳдан чиқиш имкониятларимизни сақлаб қолганмиз", - дея гап бошлади Павел Матяш.

- Осиё Кубогидаги бошқа ўйинларни ҳам кузатиб бориш имконияти бўлмоқдами ёки машғулотлар туфайли бутун диққат Қирғизистон терма жамоасига қаратилганми?
- Имкон доирасида кўплаб ўйинларни кузатишга ҳаракат қиляпман.  Чемпионат менга ёқмоқда. Иордания терма жамоасининг ўйини ва қайд этаётган натижалари мени ҳайрон қолдирди. Менимча, Иордания Осиё Кубогининг сюрприз жамоасига айланди. Биз айнан мазкур жамоа билан ўйнагандик. Тўғриси, иорданияликларни кейинги босқичга чиқишини кутмагандик.

- Захирада қолганингиз сиз учун сюрприз бўлдими?
- Йўқ. Хитой билан ўйинда кўпол хатога йўл қўйдим. Энди эса мусобақани захира ўриндиғида кузатаман. Бугунги баҳсда захирада қолганим мен учун янгилик бўлмади. Ким яхшироқ тайёргарликка эга бўлса, ўша футболчи майдонга тушади. Бу нормал ҳолат.

- Хитой билан ўйиндаги қўпол хато сизни руҳан синдириб қўймадими? Ҳар ҳолда терма жамоанинг биринчи рақамли кипери ҳисобланасиз...
- Ҳамма хато қилади. Афсуски терма жамоам учун муҳим беллашувда шундай қўпол хатога йўл қўйдим. Буёғига ўша хатолардан тўғри хулоса чиқариб ишлайман.

- Ўзбекистон чемпионатида фаолият кўрсатгансиз. Бу ўлка сиз учун бегона эмас. Терма жамоамизнинг Уммонга қарши учрашувини кузатдингизми?
- Тўлиқ ўйинни кўриш имкони бўлмади. Учрашув шарҳини томоша қилдим. Уммон ўйин бобида Ўзбекистонни анча қийнаб қўйибди. Осон бўлмаган ўйинда ғалабага эришдинглар. Нестеровнинг маҳорати эвазига Уммон керакли натижани қайд этолмади.

- Ўзбекистон терма жамоасининг Осиё Кубогида имкониятларини қандай баҳолайсиз? Ҳар ҳолда кўплаб футболчиларга қарши ўйнагансиз, уларнинг имкониятларидан бироз бўлсада хабардорсиз...
- Узоғи билан ярим финалга қадар бориши мумкин. Лекин мен Ўзбекистон терма жамоаси Осиё Кубоги соҳибига айланишига ишонмайман. Бу жуда қийин масала.

- Осиё Кубогидаги дарвозабонлар хусусида. Ким сизга кўпроқ ёқмоқда?
- Игнатий Нестеров энг тажрибали ва ажойиб кипер. Лекин Эрон терма жамоаси посбони Алиризо Беиранванд жуда кучли дарвозабон. Менимча, мусобақанинг энг яхши посбони айнан эронлик дарвозабон бўлади.

Шаҳбоз Беғамов суҳбатлашди.