ЎзПФЛ ва Ўзбекистон регби федерацияси “Спортда шошилинч тиббий ёрдам” мавзусида семинар ўтказади

Тиббиёт ходимлари 21-22 август кунлари Тошкент шаҳрида тўпланади.  

Регби ва футболнинг умумий жиҳатлари кўп: жамоавий спорт тури, яккакурашларга жуда бой, жароҳат олиш эҳтимоли табиийки катта. Бу каби шароитда малакали тиббиёт ходимларининг ўрни беқиёсдир. Бунга мисол қилиб Евро-2020 доирасидаги Дания – Финляндия учрашувида ҳушини йўқотган Кристиан Эриксенни олиш мумкин. Шифокорлар томонидан ўз вақтида кўрсатилган шошилинч тиббий ёрдам туфайли футболчининг қимматли ҳаётини сақлаб қолишга эришилди.

“Спортда шошилинч тиббий ёрдам” мавзусидаги семинар клубларимизда фаолият олиб бораётган шифокорлар учун фойдали бўлиши шубҳасиз. Семинарда иштирок этиш истагида бўлган бошқа футбол клублари мутахассислар ҳаволаси орқали рўйхатдан ўтишлари ва ундаги модулларни ўрганиб чиқишлари керак булади. Ушбу вебсайтда кўрсатилган барча шартларни бажарган мутахассислар офлайн семинарда иштирок этиш имкониятига эга бўлади.

Ўқув семинар икки кун бир хил кўринишда “Бунёдкор” стадионининг анжуманлар залида ўтказилади ва иштирокчилар икки гуруҳга ажратиб олинади.