Ўзбекистонлик мураббийлар хориж клубларида малака ошириб қайтишди

Мазкур ўқув жараёни босқичма-босқич ўтказилиб келинмоқда. Унда таҳсил олаётган бир қатор таниқли мураббийлар талабга биноан ўиш жараёни сўнггида хориж клубида малака ошириб қайтиши зарур эди. Шу боис бир қатор ўзбекистонлик мутахассисларни европа клубларида бўлиб қайтганидан хабар топдик.

Хусусан, жорий мавсум “Динамо” жамоасини бошқариб, кейинчалик истеъфога чиққан Даврон Файзиев, АГМК бош директори лавозимида фаолият юритиб келаётган Мухтор Қурбонов, “Чиғатой” футбол мактаби директори Рустам Абдуллаев ҳамда “Нефтчи”нинг собиқ устози Баҳром Ҳайдаров яқинда Россия пойтахти Москвага сафар уюштириб, “Локомотив”да бўлишди. Маълум муддат Юрий Сёмин бошқарувидаги “темирйўлчилар” клубида маҳоратини оширган мутахассислар у ерда ўзлари учун бир қатор янгиликларни кашф этишга муваффақ бўлишди.

Шунингдек узоқ йиллардан буён “Насаф” жамоасини бошқариб келаётган, 3 карра Ўзбекистоннинг “Энг яхши мураббийи” сифатида тан олинган Рўзиқул Бердиев ҳам “Про” мураббийлик лицензияси учун ўқув-курсларида таҳсил олаётганди. Воҳалик мутахассис малака ошириб қайтиш мақсадида Туркиянинг “Бешиктош” клубини танлади. Унга “Пахтакор” раҳбариятида фаолият юритаётган, собиқ ҳужумчи Жаъфар Ирисметов билан Шота Арвеладзенинг яқин ёрдамчисига айланиб улгурган Жасур Абдураимов ҳамроҳлик қилди.

Албатта мураббийларимизнинг хориж клубларида малака ошириб қайтгани футболимиз учун жуда фойдалидир. Боиси улар Европа жамоаларидан ўзлари учун керакли бўлган ишларни кашф этишга эришгани аниқ.