Ўзбекистон терма жамоаси "Пахтакор"да машғулот ўтказди

Самвел Бабаян бошчилигидаги терма жамоамиз бугун соат 16:00да "Пахтакор" марказий стадионида йиғинга киришди.

Куни кеча олий лигада тур ўйинларини ўтказган "Пахтакор", "Бунёдкор", "Локомотив" жамоалари футболчилари ва Хитой чемпионатидаги вакилларимиз Егор Кримец, Анзур Исмоилов ҳамда Игорь Сергеев машғулотларда иштирок этишди. Қолган футболчилар эса клублари сафидаги чемпионат ўйинларини ўтказиб бўлгандан сўнг терма жамоа ихтиёрига етиб келишади.

Футболчилар машғулотнинг дастлабки 15 дақиқасида енгил тартибда шуғулланишди.

Бабаян машғулот аввалида одатга кўра барча футболчиларни йиғди ва улардан ўзларини қандай ҳис қилаётишганини сўради. Ҳеч кимда жароҳат йўқ шекилли, бирорта футболчи жароҳати билан боғлиқ шикоят қилмади.

Машғулотнинг дастлабки 15 дақиқаси ОАВ ходимлари учун очиқ бўлди.

Бугунги машғулотда иштирок этган футболчилар рўйхати:  

Дарвозабонлар: Александр Лобанов (“Пахтакор), Игнатий Нестеров (“Локомотив”).

Ҳимоячилар: Егор Кримец (“Бейжин Гоан” – Хитой), Анзур Исмоилов (Чангчун Ятай – Хитой), Ислом Тўхтахўжаев (“Локомотив”), Даврон Хошимов (“Пахтакор”), Станислав Андреев (“Пахтакор”), Отабек Шукуров (“Бунёдкор”).

Ярим ҳимоячилар: Жавоҳир Соҳибов (“Пахтакор”), Жалолиддин Машарипов (“Пахтакор”), Элдор Шомуродов (“Бунёдкор”), Сервер Жепаров (“Локомотив”), Жамшид Искандеров (“Пахтакор”), Марат Бикмаев (“Локомотив”).

Ҳужумчи: Игор Сергеев (“Бейжин Гоан” – Хитой).