Ўзбекистон 2023 йилда ОЧЛда 2+2 квотага эга бўлиши мумкин, агар...

"АГМК клубининг ОЧЛ гуруҳ босқичига чиқиши бир қатор ижобий аспектларга эга, улардан бири - ОФК клублар рейтинги.

Гап шундаки, ОФК кубогидаги ҳар бир ғалаба мамлакатга 1 очко келтиради, ОЧЛда эса бундан уч марта кўп. Яъни "Насаф"нинг ОФК кубоги гуруҳ босқичидаги учта ғалабаси максимум 4 очко келтириши мумкин: 3 очко ғалабалар учун ва 1 очко гуруҳдан чиққани учун. АГМК бу 4 очкони ОЧЛдаги иккита ўйинда - бир ғалаба ва бир дуранг орқали ишлаши мумкин. АГМКда яна гуруҳ босқичининг 4та ўйини ҳам бўлади.

Айтганча Ўзбекистоннинг рейтингда тўртинчи ўринда қолиши "Пахтакор" ва АГМКнинг кўп жиҳатдан БАА клубларига қарши ("Шаржа" ва "Шабаб Ал Аҳли") ўйинларга боғлиқ. Агар иккала клубимиз ҳам гуруҳ босқичини БАА клубларидан тепада якунлашса, 2023 йилги мавсум учун 2+2 квотаси нақд бўлади. Бундан ташқари "Пахтакор"нинг гуруҳида рейтинг томонлама яна бир принципиал рақиб бор - Ироқнинг "Ал Қува Ал Жавия" клуби. Шундай экан барчаси ўз клубларимизга боғлиқ", - деб ёзади Алишер Никимбаев телеграмдаги ўз каналида.