Ўткир Юсупов: "Бугун ота-онамнинг дуосини олиб, дарвозам даҳлсизлигини сақлаб қолишни ният қилиб тушгандим"

- Бу ютуқ билан бутун халқимизни табриклайман. Президентимиз ишончи ва халқимизнинг дуоси билан шу ютуққа эришдик. Узоқ йиллардан бери армон бўлиб келган ишни амалга оширдик. 

Бугун бизни дуранг ҳам қониқтирарди. Ҳаво жуда иссиқ, намлик баланд эди. Ўзимизнинг шифокорлар, шунингдек, ЦСКАдан ҳам шифокорлар келиб, бизга анча ёрдам беришди. Иссиқда танадан кўп миқдорда сув чиқади, улар айнан шуни витаминизациялаштириб, анча ёрдам беришди. Бугун яхши ўйнаб, натижага эришдик.

- Бугун дарвозангиз олдида жуда кўп вазиятлар бўлди. Ўйинга қандай тайёргарлик кўрдингиз?

- Ҳар бир дарвозабон ўйинга чиқишдан олдин гол ўтказиб юбормасликни мақсад қилади. Бугун мен ҳам ота-онамнинг дуосини олиб, дарвозам даҳлсизлигини сақлаб қолишни ният қилиб тушгандим. Бу орқали жамоага ёрдам берганимдан хурсандман.

- Қайси вазият мураккаброқ бўлди?

- Ҳар бир эпизод ўзига яраша. Рақиб ҳужум қилаверганидан кейин босим бўлади. Уларнинг ҳужумларини бартараф қила олдик, - деди Юсупов.