Осиё Кубоги. Пол Ле Гуэн Австралияга юқори баҳо берди

Уммонликлар кеча Австралия билан кечган баҳсда йирик 0:4 ҳисобида мағлубиятга учрашди. Бу жамоа биринчи ўйинда Жанубий Кореяга ютқазганди (0:1), мана энди Австралиядан ҳам мағлуб бўлди. Натижада жамоа 0 очко билан охирги ўринда бормоқда.

Терма жамоа устози Пол Ле Гуэн кечаги рақиб Австралияга жуда юқори баҳо берди: "Австралия ҳақли ғалабага эришди. Улар узоққача бора олишади. Улар биздан ҳар томонлама устун келдилар. Австралиянинг кучсиз томонини топиш ниҳоятда қийин, улар стандарт вазиятларда ҳам, ҳаводаги курашларда ҳам, ердаги ўйинда ҳам зўр".

"Албатта, бизда ҳам имконият бўлди, лекин кўп эмас. Тўртта тўп ўтказиб юборганимиздан фожеа ясаш керак эмас, чунки Австралия чиндан ҳам кучли жамоа. Биз эса ҳеч нарса қила олмадик. Рақиб ўйинчиларида куч, физика, техника, хуллас ҳаммаси бор. Австралия чарчаб қоладиган жамоага сира ўхшамаяпти".

"Мен футболни жуда яхши тушунаман. Ўрнимга исталган мураббийни қўйинг, Австралия ва Жанубий Кореяга қарши баҳслардан олдин ниманидир ўзгартиришга ҳаракат қилади, бироқ бу осон иш эмас. Чунки биз бошқа босқичдамиз, улар эса бошқа босқичда. Буни тўғри тушуниш керак" - дейди франциялик мураббий.