Осиё Кубоги. Ироқ мураббийи 2007 йилги натижа такрорланишини хоҳлаяпти

Бугун одатга кўра ўйинолди матбуот анжумани ташкил қилинди. Матбуот анжуманида иштирок этган ироқликлар бош мураббийи Радҳи Шенайшил қуйидаги фикрларни айтиб ўтди:

"Эронни мусобақадан чиқариб юборишимизни кўпчилик кутмаганди, лекин буни уддаладик. Ўйлайманки, Жанубий Корея билан бўладиган баҳсда ҳам сенсация қайд эта оламиз. Ҳозир Ироқ футболида янги авлод шаклланиб келмоқда. Ҳозирги футболчилар билан бемалол 2007 йилги натижани, яъни Осиё чемпионатидаги ғолибликни такрорлай оламиз".

"Эртанги баҳс жуда қийин кечади. Турнирнинг ярим финалига тўртта кучли жамоа етиб келди. Бизда бу ўйинга тайёрланиш учун уч кун вақт бўлди. Албатта, қисқа фурсатда тўлиқ ҳозир бўлиш осон эмас, лекин қўлдан келганча ҳаракат қилдик. Шубҳасиз, Ж.Корея - Осиёнинг энг кучли жамоаларидан бири. Аммо бундай ўйинларда рейтинг роль ўйнамайди, ким кучли бўлса ўша ғалаба қозонади. Рақибимизнинг Ўзбекистон термасига қарши ўйинини кўрдим, улар қарши ҳужумда анча кучли экан".