Осиё футболи. Австралиянинг янги бош мураббийи ишга киришди

Бу аввалдан маълум эди. Чунки ван Марвейк билан шартнома мундиал охиригача тузилганди. Эндиликда терма жамоани маҳаллий мутахассис Грехэм Арнолд қабул қилиб олди ва "соккерузлар" ушбу мураббий қўл остида Осиё Кубоги-2019 мусобақасига тайёргарлик кўришади.

Австралия жаҳон чемпионатида кўнгилдагидек иштирок эта олмади. Жамоа атиги битта дуранг билан гуруҳда охирги бўлди. Лекин янги мураббий ишга киришгач  бундан кейин ҳаммаси яхши бўлишини таъкидлаб ўтди.

"Ҳар доим битта натижани ўйлаб юриш яхши эмас. Жаҳон чемпионатидаги иштирок биз учун ортда қолди ва буёғига келажакни ўйлашимиз керак. Ижтимоий тармоқларда терма жамоа ҳақида кўп салбий гаплар ёзилмоқда, футболчилар эса буни ўқиб таъсирланишяпти. Ҳаммасига Австралиянинг кўп гол урмагани сабабчи. Лекин бизда гол уришни биладиган футболчилар бор, фақат улар билан ишлаш керак. Футболда фақат тўп чарчамайди, одамлар эса югуравериб толиқади. Кучли жамоага айланиш учун фақат ва фақат меҳнат қилишимиз керак. Бундан бошқа йўл йўқ. Австралияда кучли бўлиш учун ҳамма шароит етарли", - дейди 54 ёшли мутахассис.

Эслатиб ўтамиз, Австралия Осиё Кубоги мусобақаси гуруҳ ўйинларини Иордания, Фаластин ва Сурияга қарши ўтказади.