Ўртоқлик учрашуви. "Локомотив" - "Обод" 5:0

Тошекнт Темир Йўл Муҳандислари Институти футбол майдонида бўлиб ўтиган ушбу назорат ўйинида Вадим Абрамов шогирдлари рақибларидан тажриба ва маҳорат борасида анча устунроқ эканини намойиш этиб берди. Ўйиннинг дастлабки дақиқалариданоқ тўп назорати ва ҳужумкорликка эътибор қаратган "темирйўлчилар" бир неча хавфли ҳужумлврни амалга оширди. Шулардан биридан кейин, ўйиннинг 5-дақиқасида ҳисоб очилди. Голга Вячеслав Шевченко муаллифлик қилди.

30-дақиқа Иброҳим Раҳимов ўнг қанотдан олдинга борди ва ерлатиб кучли зарб билан жарима майдонига йўлланган тўп, рақиб футболчиларидан бирининг оёғига тегиб, дарвоза тўридан ўрин олди. Биринчи бўлим 2:0 ҳисобида якунланди.

Танаффусдан кейин "Локомотив" яна 3 бор рақиб дарвозасини ишғол қилди. Аввалига Кожокар ҳисобни 3:0 кўринишига олиб келган бўлса, кейинроқ икки ҳимоячи - Евгений Гоголь ҳамда Илҳом Суюновлар биттадан гол киритиб, якуний ҳисоб 5:0 бўлишини таъминлаб беришди.